LANLAN TRAVEL: Day 19 .3－尋找德國豬手的故事

以下係一個尋找德國豬手的故事：

今日其實有時間可以去埋女人島，不過覺得冇乜特別，玩咗十幾日，加上旅程尾聲，攰＋冇乜心機！所以放棄！

3點幾返酒店休息

老公由第一日到奧地利，已經想食德國燒豬手，但因為我要食Ribs，如果Ribs＋豬手，怕食唔晒，所以冇食到（呢間係全程見到有原隻燒豬手嘅餐廳)

之後，在匈牙利布達佩斯、克羅地亞16湖附近餐廳，都食到斬件上的豬手，但老公想食係原隻燒豬手，到噖晚，到德國基姆湖，諗住實有豬手食啦，點知樓下餐廳都係斬件上的豬手！

今日中午附近又搵唔到有！3點幾有時間，就上網睇吓邊度有得食，但酒店Wi-Fi收得唔係咁好，唯有Whatsapp問妹夫幫手搵吓(佢哋玩德國2星期剛回香港)

妹夫上網搵我哋附近地方，見到有網友住Seebruck，有豬手食，咁我哋就開車去，大約18公里20分鐘車程

18:19去到，應該就呢度，但點解係間民宿？唔通民宿入面有餐廳？入到去，係冇得食嘅！不過民宿主人好好人，比咗張餐廳卡片我哋，話行幾分鐘就到，重話泊車喺度都OK

之後再諗，應該係妹夫見到有網友住呢間民宿，喺附近食到燒豬手，當時網絡收得唔好，加上我哋又心急出門口，冇睇清楚，唔緊要⋯最緊要附近有得食

跟民宿主人比嗰張卡片，去到間餐廳，冇得食，唉⋯!! 呢一間就話，另外一間應該有⋯⋯

咁再搵啦⋯⋯

18:30呢間唔似餐廳，似車房，佢對面有間餐廳，當時有伯伯經過，問佢，伯伯話行前面，再過橋，應該有⋯

過橋好似好遠咁，當時18:34

18:51近近哋入好似車房間屋對面間餐廳，呢間係旅館＋餐廳嚟，見到女侍應著晒德國傳統衣服，心諗⋯呢間應該有得食嘞啩⋯

但⋯都係冇！！！

冇得食，就影吓間餐廳養嘅水母

老公話唔搵嘞，好似大海撈針咁，咁我話返酒店樓下餐廳食囉，噖晚嗰餐雖然唔係原隻燒豬手，都類似啦，味道都OK㗎，老公話唯有係咁

當時都有諗過開車去慕尼黑Hofbrauhaus食(簡稱HB)，一定有得食，開車去90公里，約1個多小時，老公話太遠，唔去

返酒店途中經過一個小鎮 Breitbrunn am Chiemsee，見到有間餐廳，我話不如入去問吓

男侍應英文唔好，叫我哋等等，咁即係冇，老公話重等咩啫，但侍應態度好好，唔好意思就咁走咗去，等咗一陣，原來係叫個廚師出嚟，廚師英文較好，話燒豬手要一日前預訂(都估到係冇！)，但有Similar(吓⋯咪同噖晚酒店老闆講一樣)，咁我哋2個商量後，諗住都係同廚師講，我哋唔食嘞(都係食返噖晚隻豬手穩陣D)，廚師見我哋商量時，以為我哋唔明，又或者想我哋試吓佢手勢啦，又叫我哋等等，入廚房個焗爐，成舊拎比我哋睇，睇完我哋都知唔係燒豬手，但佢咁有誠意，都唔好意思走

坐低之後，間餐廳英文菜牌都冇，侍應又叫個廚師出嚟，幫我哋落單，我都唔知食乜好，只好話食香腸(當時諗唔起食燒雞，通常都好食)

19:34廚師Similar的豬手，係一大舊豬肉去烤焗，做法似香港人食開嘅燒肉咁，豬皮好厚，但非常香脆，肉質都唔錯，都幾好食，豬手€9.8啤酒€2.9

當地人可能好少好似我咁，香腸當正餐食，或者餐牌都冇呢個餐，點解咁講，因為埋單先知我呢碟係€2.8！或者呢份平時應該係早餐嚟，但早餐都太平

第一日公路上便利店食早餐，一條腸＋一個包＋一杯咖啡，都要€6.79

呢餐如果唔係一心只想食燒豬手，其實都唔錯，只怪我哋搵極都搵唔到，冇乜心機，一路食個心就掛住隻豬手

埋單時比咗Tips，侍應重話唔使，我話OK，侍應好開心咁收咗，呢間餐廳廚師同侍應都真係好Nice，因為通常我哋一般都有比Tips，但多數都係平淡一句 Thankyou，咁多次都係16湖間餐廳同呢間咁好笑容，小鎮果然人情味濃（明天在慕尼黑食飯比Tips遇到不禮貌對待添）

20:02就係呢間餐廳，臨走影番張相，應該都冇機會再嚟