第二日

2013年10月24日


瞓得唔係太好，未夠7點就起身，今日天氣麻麻

7:30 食個豐富早餐

呢2杯係乳酪，可惜早餐冇甜品食

嘆咗一個鐘早餐，餐廳出面就係泳池，行吓先

用電話影嘅全景相

酒店人工沙灘，唔清，所以好少人游水

行去另一邊嘅碼頭，天日喺呢度上船去島

望返上3樓住嘅房

泳池另一邊

10點多D坐的士去 Wisma Medeka 商場，諗住搵咗間阿林蝦麵位置，行一陣就食，點知冇開，呢個商場又冇嘢行，就去附近碼頭行吓

碼頭好多蟹

呢度好多人會問你出唔出海，當然No啦，就咁搵好冇安全感，而且我哋Package包咗

行到劍魚廣場

之後行咗去KK Plaza地下下面嘅超級市場，買吓咖啡同少少手信

行去加雅街，冇乜嘢行，都係坐低食嘢

11:54 五星海南雞飯，我要咗雞脾，貴D㗎，早知要普通算，雞唔覺好好食，飯就都夠味，不過淋咗D

老公話好熱又冇冷氣，又唔係好餓，所以食淨魚旦，老公話唔好食，梗係啦，呢度係食海南雞飯㗎，講又唔聽，拉茶都唔好飲，好淡

最好食係碟芽菜，老公鍾意佢甘甘哋，呢餐RM26.80

時間尚早，周圍行，行咗五星後面，早知食隔離嘅怡豐

之後見到美麗華超級市場，又入去買少少嘢，見到美金香，買咗半KG豬肉乾

其實重可以去食件Kaya多士，約咗沙巴遊13:30喺味雅等，老公話預早D，所以1點鐘就係味雅等，等咗陣，諗諗吓好似唔係味雅，所以就打電話比沙巴遊，原來係味雅對面酒店大堂等，好彩都係打過電話去啫，老公話咁緊要嘅嘢我都會記錯，真係信唔過，哈⋯係因為只記得味雅，而唔記得後面⋯⋯味雅對面間酒店，抵鬧

間酒店唔記得名咯，有幾個人都係同一地方等，導遊會數齊人先開車，有人遲到，所以真係足夠時間去食件Kaya多士，之前重好曬，上車時落雨，導遊話沙巴天氣係咁喎

上到車，要接埋市中心酒店其他人，去到香格里拉酒店接唔到人，導遊話個團友講錯，唔係市中心呢間香格里拉酒店，喺同我哋同一間嘅Shangri－La's Tanjung，呢2個係台灣人，我哋其他6個全部都係香港人，好彩冇強國人

接咗2個台灣人，大約2點，正式開車

14:40 到第一停車點，買生果

簡陋廁所，比咗RM0.2，導遊先話之後重有，照去，當見識吓

15:39 呢度乾淨好多，不過差一個鐘車程

坐呢架Van仔，連司機導遊共10個人

16:27 去民居食下午茶，晚餐都係呢度食

炸香蕉同咖哩薯仔，咖哩薯仔幾好味，但去廁所時見到D薯仔發晒芽，好彩冇肚痛

食下午茶時同2個台灣人傾偈，我哋話去過墾丁覺得唔錯，佢哋過墾丁太多人，同埋台東風景靚D，但我覺得墾丁比沙巴嘅沙灘靚，市區都整齊D


坐艇仔遊紅樹林睇長鼻猴

16:54 好多艇睇長鼻猴，呢度冇落雨，天氣唔錯

紅樹林

呢隻算大鼻，都算睇到

日落都OK

呢個係女導遊

18:13 食晚餐

自助式晚餐

重有甜品

加咗湯嘅米粉，味道幾似肉骨茶，我覺得唔錯，老公話麻麻，咖哩都OK

導遊叫我哋慢慢食，但唔夠半個鐘就叫我哋預備出發

螢火蟲真係好多，好似聖誕樹閃吓閃吓，好靚好靚，導遊話今日算多螢火蟲，導遊有個燈，照吓就引到螢火蟲過嚟，有隻重停喺我手，好開心，有D會停團友個頭添

18:56 呢2張算多

大約9點返到酒店

導遊帶去買嘅生果RM22，計返港幣50幾蚊都唔平，不過噖晚買咗4、5個橙仔都要RM4，都知沙巴物價冇想像中咁平，右手邊嗰2個好細就係噖晚買嘅橙

今日超市買嘅手信，咖啡其實同香港差唔多價錢，重同老公講點解D人買咁多，不過都買包啦，返到香港先知，原來比香港多5包，我⋯真係白癡⋯哈哈

老公喺我頭度搵到隻蟲，睇螢火蟲時有隻留喺我頭度好耐，已經趕咗佢走，呢隻唔知係咪螢火蟲，係就我累死佢⋯嗚，不過佢未死㗎，喺露台放生，希望佢生存到啦

第一次睇到咁多螢火蟲，好靚好鍾意，不過老公話來回5、6個鐘車，睇嗰一陣，雖然好靚，但好辛苦喎，但我覺得值得，有機會都想再睇呀