Day 5 .2－匈牙利～森檀德小鎮被抄牌、巴拉頓湖

15:06 到森檀德Szentendre，多瑙河畔小鎮

架車泊在多瑙河畔

行錯方向，呢邊冇遊客

中心教堂位置Blagovestenska Templom

行上上面教堂

見到間快餐店，叫一個餐加一個包Ft830，唔貴，但要盒茄汁竟然要加Ft100，真係唔抵，但老公話食薯條要加茄汁

D花好像人面 ，有眼鼻口

好多人坐街飲咖啡

雖然剛食咗個包，但想坐低嘆吓，老公話唔食，周圍行吓

所以⋯一個人的咖啡，蛋糕好食，Ft860 ，頭先兩個人食快餐都係Ft930，老公又話我蹝錢

老公行完返嚟，叫佢坐低飲啖咖啡，佢話叫一份兩個人食，肉酸，唔坐，OK⋯我食晒

就係呢間咖啡店

河邊小鎮，好舒服

喺飲完咖啡，悠閒地行去多瑙河邊，影吓相，小鎮行程本應完滿結束

但⋯⋯行返去架車度，發覺⋯比人抄牌⋯⋯吓⋯⋯車頭有個透明紅色膠袋，裝住2張紙，唉！！！乜唔係假期唔使入錶咩？竟然在小鎮比人抄牌！

我每次泊到錶位，都會問人使唔使入，但呢度係個小鎮，加上假期，咪冇問囉，點知就衰咗！

老公叫我拎張紙去Information問，問吓點交罰款，唯有去問吓啦，行到去Information，已經過咗5點，閂咗門，冇計啦，老公話之後再算，開車走


19:03 到巴拉頓湖Balaton，離遠見到湖邊睇到日落，影相先

估唔到睇到咁靚嘅日落

影日落除咗我哋，得2個遊客

巴拉頓湖係中歐最大湖，係匈牙利人心中嘅海，夏天好多人嚟渡假，而家淡季，冷冷清清

老公影日落，我在後面吹風

睇湖面浪，就知有幾大風，好凍呀

19:37 Hotel Jogar 外型幾特別

酒店好簡單，重以為老公會投訴，點知老公話OK，住一晚啫，巴拉頓湖只係過路性質，平平哋，冇所謂

廁所番新過，好新淨

呢間真係好抵住，話晒都叫酒店，€34/晚包早餐，全程最平，早餐都好豐富，老公話雖然前2晚間Apartment好大，但我哋唔需要咁大，我哋鍾意住酒店多D，一嚟包早餐，食完就走，二嚟我唔會煮食，最多夾麵包，要廚房都冇用

想信巴拉頓湖係淡季先咁平，因為周圍都好靜

搵咗間餐廳食飯，又係冇其他人

凍冰冰飲個湯，非常清淡，懷念布達佩斯嘅濃湯，一樣都係匈牙利，湯點解分別咁大

老公成日話我食貴嘢，今餐叫平D，又衰咗，以為叫白汁意粉，點知就係芝士撈意粉，激死

老公個炸雞就OK

但Staff態度好好，見冇其他客人，老公飲完啤酒，又飲咖啡

想食返第一晚布達佩斯個甜品，但今次個Pancake入面係朱古力花生，好甜，麻麻哋

呢餐味道一般Ft5420，價錢比布達佩斯第一晚平D，但第一日晚好食得多，返到酒店睇清楚張單，先見到收咗27%服務費，嘩！好誇張啫，HK$200一餐唔係貴，但收咁多服務費就唔合理囉，匈牙利間間餐廳收嘅都唔同，諗住最貴都係收15%，匈牙利食嘢唔貴，Ft5420一餐都咁上下啦，所以冇睇清楚囉！

酒店裝飾

呢2張就係在森檀德被抄牌張單，第二朝問酒店職員，話可以去郵局交，但係假期，唔開！之後要去克羅地亞，離開匈牙利，點交罰款？

同妹夫Whatsapp，因為佢之前在布達佩斯交過罰單，問佢點交，而佢早2星期，亦在德國隧道超速，所以問吓專家

妹夫話上次交比房東交，今次交比租車公司，租車公司會在信用卡扣數

咁我哋就email比租車公司，過幾日，租車公司話不能代我哋交，可能因為我哋喺係在匈牙利抄牌，好煩，都唔知點交！

後尾去到克羅地亞，去銀行問，可唔可以滙款去交，銀行叫我哋去郵局，郵局又叫我哋去銀行，老公話算，等匈牙利罰租車公司，租車公司自然會扣我哋數，貴D都要，都已盡力去交，交唔到都冇辦法！