2017年8月19日 星期六

歐洲租車自駕注意~柴油車

近幾年多數去旅行都係自駕遊,歐洲自駕今次係第三次,再加上台灣、日本咁,諗住自駕都冇乜問題

第一次意大利租車

第一次租到油渣車(柴油車)

經 Rental Car租Maggiore


之前2次都係租Sixt,老公今次都想租Sixt,但今次唔係慕尼黑攞車,Sixt貴D,意大利分店較其他意大利租車公司少,所以㨂意大利本土公司,呢間Maggiore都幾大間


12月16號,第一日攞車時冇留意「Service entro 1600km」 係咩意思


20號,離開意大利去緊天鵝堡,又出現 Service 800km,諗住係提醒維修


21號,到符茲堡入油, 出現 AdBlue 600km

問其他入油人士,話:哦⋯Adblue, Not Emergency

老公話知道柴油車係要入環保尿素(我一D都唔知!),AdBlue--應該係尿素

當日攞車,租嘅Volvo XC60車比唔到,比呢架Audi A5,當時有水漬,似有人剛還車,之後車行清潔吓就交車,根本呢架車未準備好就出租,一撻車就出現--Service entro 1600km 我哋租17日,要每日開唔夠100km,先唔超過1600km,歐洲租17日車,應該不可能吧!車行Staff用腦諗吓都知,唔應該租呢架車比我哋!

雖然知要入尿素,但可能係提醒啫,覺得冇理由要我比錢入,諗住唔理⋯⋯又唔知唔入得唔得,亦諗過開車去米蘭車行同Staff講,不過當然唔可



24號,離開慕尼黑,經過一個油站入油

今次係300km,Refill Adblue,No restart,事態嚴重

之前問人話係: Not Emergency,都係再問吓人好啲,德國油站Staff係阿嬸,話No English!


打開車頭蓋,尿素入去邊個位都唔知,唉⋯唯有走


唔安心,WhatsaApp 問吓香港柴油車嘅朋友,朋友話佢喺香港係重來冇入過環保尿素,唔知有呢個問題,應該係去車行保養時,職員Check車已入咗

朋友即刻上網揾資料,話唔入尿素,有機會鎖車⋯!?

吓⋯咁大鑊⋯點都要解決呢個問題



行大公路,去到一個叫 Irschenberg-Sud 地方(而家電話影相真係好方便,睇到位置),當時心急又混亂,冇影到相,應該係德國邊境、奧地利前,因有奧地利路票賣,有個大休息站,附近有油站、餐廳


朋友 D & M 好好,上網揾咗D短片教點入尿素WhatsaApp比我哋睇

原來入AdBlue(尿素)位置在油缸隔離,但點扭開個蓋呢?

大休息站,好多車停低休息,老公問咗一個開柴油車司機,肯幫我哋

買AdBlue時排長龍,重叫我哋唔使急,好好人,我哋怕阻住人,梗係想快啲

買咗之後,點扭開個蓋呢?個外國司機喺我哋架車揾唔到工具,去佢自架車攞,但唔啱用,又再揾我哋個車尾箱,咗一輪,終於揾到

估唔到AdBlue咁大支

呢個司機 Very Very Very Nice


入完之後,除咗多謝多謝之外,即刻開行李攞盒朱古力送比佢個女(好彩之前有買朱古力),小小心意,阻咗人好耐,佢都係遊客,係東歐人

要用呢個工具先開到蓋入AdBlue

要拎開晒行李,再打開個冚,先見到

入淨少少,怕滿瀉


我哋以為,買AdBlue嘅錢,要返香港慢慢追,先追收到,估唔到⋯還車當日,拎張單比車行睇,Staff一望,即比返錢我哋,因為呢啲係車行責任

香港柴油車去車行保養時,Staff會入尿素,所以車主唔知道,車開到某個里數,就要入尿素,而歐洲車主,要自己入,所以油站都有得買(呢事件之後坐妹夫車去廣東自駕遊,留意到大陸油站都有尿素賣)

今次又多一樣經驗,總算有驚冇險

老公話,如果德國租車,應該唔會有相同問題,因德國人做嘢比較小心謹慎。


4 則留言:

  1. 雖然我地喺歐洲自駕既機會好低,不過呢篇既資訊好有用.
    有時喺其他地方揸車對車既認識好重要,至少打開車頭冚都知道邊樣係乜,有時見到有啲人香港冇車平常都冇揸開車,去到其他地方一租車揸就話要點樣點樣開快車真係同佢地抺一把汗.

    回覆刪除
    回覆
    1. 有朋友冇車牌,又想自駕遊,同佢自己朋友自駕去台南,平日香港冇揸開車,二家7口有大有細,要租7人車,第一日已經抄車,好彩人冇事,自駕遊我覺得要香港揸開,有一定經驗,去到外地,左右軚唔同,加上各樣問題,真係要小心!

      刪除
    2. 好多人都係咁話喺人多車多又成日塞車既香港都揸得掂既話,去到外國揸都會輕鬆得多,正如好多人喺外國揸開車返到香港唔敔揸車.

      刪除
    3. 去到外地除咗少車,歐洲、日本人都比較守規矩同禮讓,又可以開得快,老公話歐自駕好正

      刪除