2017年8月12日 星期六

意大利、德國買物及退稅


旅行唔會買太多嘢,尤其擺設飾物,放屋企阻碇又唔捨掉,萬般帶不走,衫褲鞋襪其實夠用就好,太多浪費對地球做成負擔,但歐洲買又真係平好多,又比較實用,加上有退稅,都係忍唔住



德國在同一日在同一店舖買滿25可退11.4%,意大利買滿155,就可退12.9%,雖然德國退稅額比較少,但買得少都可退


但實質中冇退咁多,因為會扣手續費


McArther Glen Design Outlet(意大利威尼斯附近)

GEOX鞋,因為香港貴一直冇買,第一次著,呢對啡色鞋幾舒服,我對腳踭唔係咁好,好多鞋要加鞋墊,但呢對唔使加,約$600,老公鞋$740,真皮卡片套約HK$6X,NIKE外套冇退稅$330,比較下就唔算好抵

Calvin Klein老公第一次著,舒服,特價約HK$240二條,叫老公去斯圖加特 Outlet City Metzingen 再買多D,因為德國退稅額比意大利低,但去到又冇 McArther Glen Design Outlet 冇咁平,早知買多D



Outlet City Metzingen(德國斯圖加特附近)

LACOSTE T恤,退稅後一件約$260一件約$175,抵

卡片套退稅後約$70,銀包顏色唔靚,約$150,2件質地係膠質,但老公話LACOSTE喎,而且幾硬淨,抵,買咗先算

MUI MUI 手袋,退稅後$3100,好平,重平過上年米蘭買嘅LV銀包,係舊款,有特價,忍唔住買咗,返到香港覺得好重,唔想用,問米蘭站話唔收,唯有留冬天用

呢幾次去歐洲都會買嘅咖啡,今次在 Outlet 的ROSSMANN買,特別平€3.79,之後都見唔到咁平




慕尼黑市中心

估唔到GEOX鞋在慕尼黑市中心價錢同Outlet差唔多,款式重多重新

退稅後毛毛鞋約$550,鍾意個款又平,但香港冬天咁熱,著唔到幾日!老公2對鞋約$840及$810,都好平

鞋都幾阻碇,但實在好抵,點忍到手

我哋香港嘅孖人牌,一套連指甲挫HK$400,好貴,但剪完唔使點磨指甲,好好用,指甲挫就一般

所以⋯去到德國,老公話要再買孖人牌

孖人牌一套小刀12.95

2個指甲剪,一個9.95,另一個€6.95,唔記得邊個貴D,左手邊,款式似我哋香港嘅孖人牌,但呢個係VICTORINOX ,見個樣同孖人牌差不多,買嚟試吓,但冇咁好用

右手邊指甲剪雖然係孖人牌,香港賣HK$199,但一分錢一分貨,都係香港買嘅孖人牌款式好用,但我用慣傳統指甲剪,所以買一個,全單29.85,重可退稅€3,但最後冇退到

dm藥房~Balea網上話HandCream好用,可能買錯款式,覺得唔好用,Alpecin洗頭水係香港半價,之前用覺得防脫有效果,用耐覺得又甩多咗頭髮,而且都係平幾十蚊,又重,唔想買,但老公話買一支都唔太重,鞋墊貪平試吓,唔得


我的重點買物

在慕尼黑當日,周圍揾藥房,買維他命C,即台灣網友講的發泡錠

買咁多係因為老公阿哥話食咗幾年維多X,鼻敏感不知不覺好咗,老公阿哥話而家去德國,會去當地藥房買,重話好平添

我鼻敏感多年,都試過好多方法,既然到德國,梗係買多D,不過⋯維多X每片份量比德國買嘅多3倍,但就算每日食3片,都平過維多X好多,所以買咗好多

Muller~ €0.45一支,買咗10支,檸檬味,幾好飲

 dm €0.4一支~當時覺得提子味(葡萄味),唔係咁好飲,又冇橙味,買咗8支,後尾覺得飲呢個味道鼻敏感好似好D(還在試驗中),下次會買多D呢個味

重有ROSSMANN €0.45一支,三間藥房橙味、檸檬味都幾好飲


唔理對鼻敏感有冇效果,有時口渴當果汁都唔錯

離開慕尼黑前,再去另一間dm,買多10支橙味,Oral-B 牙刷頭€6.45二支,唔係平好多


我買咗幾樣嘢,買得最開心係維他命,老公話我傻傻哋,HAHA⋯因為多又平,一共買咗47支,當時我哋唔舒服,旅行期間,日日都飲,不過拎返香港真係幾重



去到BMW展覽館,作為X1車主,當然想買我哋架車X1模型,但冇,老公就買咗X6模型€4.95,期望下次換車可以買真・X6車,但我鍾意X5多D



到聖誕市集的紅酒杯

第一個去聖誕市集係符茲堡,第一杯熱紅酒,呢隻幾鍾意


紐倫堡,杯型都唔錯


慕尼黑~放棄另一隻飲過嘅紅酒杯,買咗呢隻,但呢隻而家覺得一般,當時市集太多人,好難揀


最貴係呢一杯紅酒連杯€ 7.5,但鍾意


3個聖誕市集4隻杯,各有特式

PHYTO 洗頭水,幾年前用過防脫洗頭水幾好,後尾香港分店不多,就冇用,2015年坐郵輪去馬賽又買唔到,今次去到 La Spezia(五漁村前小鎮),防脫洗頭水都係冇,Staff介紹呢個Shampoo Reparing,效果好好,甩少一半頭髮,€13.2一支,香港$220,平100蚊


Christophe Robin,洗頭水、護髮素32及28,香港約450/支,朋友比我早一個多月去米蘭,話大教堂旁的文藝復興百貨公司Rinascente有得賣,但當時冇洗頭水,我去時有就幫佢買,原來呢個牌子好出名,咁我買咗一支洗頭水+Hair Mask (Regenerating Mask) €51,因為買咗€171有退稅香港6折左右

洗頭水用完係好有蓬鬆的空氣感,我攣頭髮都啱用,Hair Mask用完好順滑我頭髮少,再買會買 PHYTO 的 Shampoo Reparing+Christophe Robin的Hair Mask



米蘭機場DutyFree

2015年坐郵輪,都係米蘭機場返香港,上次機場 Duty Free買完,比咗張Coupon,有22%折扣,朋友一個多月前都有,原來要買夠80先有Coupon

今次我先買LA MER Treatment Lotion €100,咁就有Coupon,再買支Concentrate,老公買支Hennessy XO,有22%折扣當然抵




因為抵,再買多支 Martell XO


用Coupon有上限,但唔記得幾多錢,2支XO+LA MER Concentrate €600.99,已經超過限額,但Staff都照比折

22%折扣,LA MER後悔買得少,但老公已經話我支Concentrate貴過佢買2支XO


2015年年尾去郵輪,已經在米蘭馬賓沙機場Malpense做過退稅,諗住應該冇乜大間題

但意大利真係⋯!

Check in 後要有 Boarding Pass,先可去海關Counter蓋印,呢個Staff,睇吓我哋嘅單,又同人傾偈,望吓傾吓,面紅紅咁,似飲咗酒,重唔記得比返Passport我哋(意大利做嘢係咁上下)


4點幾退稅唔多人(朋友話早機好多人)

我哋鍾意退Cash,點知Staff話,只可意大利境內買物可退Cash,歐洲其他地區,Only 退Credit Card

吓⋯2015年年尾去郵輪,法國馬賽買完,都係呢個米蘭馬賓沙機場Malpense退稅,當時都可退Cash,一年多D就改,唔可以退Cash

上次交退稅單,都有Staff望吓,今次,淨係叫放入對面個箱,係一個好細嘅箱(似垃圾箱多D),退稅單呢⋯睇都唔睇,態度又差!

我哋唔放心將退稅單放入個箱(真係似垃圾箱),再去Counter,之後有另一個Staff,肯望吓有冇填錯,又肯收退稅單,總算放心D

退Card係第一次,因為網上話如果Card收唔到係冇得追討,我哋都等咗2、3個月(朋友話一星期收到),以為實收唔到,好彩最後都有,但個兌匯價好差7.648,雖然退Cash都要扣€3-4手續費,但即時收錢,安心好多



老公當時好㷫,話早知唔退稅,好似乞食咁,我哋又唔係買得多

上次坐郵輪對意大利感覺冇乜特別,今次去完,印象係我去過歐洲幾個國家中最差,當然⋯重有其他事發生,係好幾件事加埋。

3 則留言:

  1. 鞋真係好平喎,個價錢香港根本買唔到.
    防脫髮洗頭水真係有效?我喺日本都曾經幫人買過日本出品但係好似冇乜效.
    而家歐洲退稅用信用卡或者現金好好多,舊時用支票寄番黎抬頭又錯根本冇退一樣.

    回覆刪除
    回覆
    1. 剛消費者委員會 公佈,Phyto 冇二噁烷/可致敏防腐劑/甲醛,我放心用,之前係 用Revitalisant Shampoo 防脫,甩少咗,今次用Reparing,效果更好,早前去Counter再買時,店員話用Reparing好就繼續用,我係幼髮質,易甩,你可以去Counter問吓適合邊隻,幾年前在卓悅買過,平好多,但近年好似冇
      都用過韓國"呂",初用有少少效果,用耐都係唔得!

      刪除
  2. 靴形的紅酒杯真係好靚,必買 !

    回覆刪除