Day 10 .1 - Caumasee 考瑪湖

瑞士的考瑪湖Caumasee，位於Chur庫爾的Flims小鎮

由懸崖餐廳到Caumasee係唔順路，重要行一段回頭路，今次再到，係因為細妹見過我哋2011年影嘅相，覺得好靚幾似九寨溝，噖日離開策馬特都想去Blauesee藍湖，但藍湖比較細，噖日又比較趕，最後選擇去考瑪湖(其實今日都趕)

呢個2011年影的Caumasee標誌，唔知點解今日見唔到

15:53到Caumasee考瑪湖外的停車場🅿️

行入去湖大約15分鐘

7年後再到，玻璃水色的湖水，都重係好靚

顏色有層次

坐電梯落湖邊

二次都冇坐湖邊嘆咖啡，上次入森林行，今日都冇時間

妹夫瞓草地享受

要走，搭電梯上返去


湖水要由上面影先靚

路旁多樹林，空氣清新

16:58有間酒店，夠晒清靜

以下係上次影的3張相，上次行雪地行森林，感覺又唔同

呢張行入森林，光線好靚

U型河谷

當時係2011年10月11日，之前一日應該落過雪，又有霧氣，仙境一樣，但今日就陽光較光，影射到湖水顏色更鮮豔，以湖水色計，今日更靚

原本諗住去考瑪湖影幾張相就走，最後來回用咗1小時左右，瑞士🇨🇭行程完結，今晚住意大利🇮🇹的 Curon Venosta小鎮，要開145公里，因為係山路，要差不多3小時

18:42 轉司機，休息一下

山路不能開太快

2位司機呢程專心開車，未夠8點就到達

呢晚酒店係包晚餐，去到Check In，Staff話晚餐完咗！嚇⋯完咗❓咩意思❓明明係包晚餐

Staff話晚餐時間係7點，廚師已收工，見到餐廳有其他住客食緊晚餐喎❓除咗餐廳，重見到另一邊的酒吧都幾多人添，係⋯但Staff話晚餐時間係7點，訂房紙有寫明要凖時7點到達食晚餐，噢😱！係我嘅錯，我睇唔到！

上次去意大利，多數餐廳都7點到7點半先開門，冇諗過呢間要7點前到！

咁點呢❓房價包咗晚餐，減晚餐價錢出嚟❓Staff問老闆，老闆都係英文麻麻，話冇Main Course，但會有湯同麵包等比我哋食，講得唔係好清楚，附近唔似有餐廳(附近嘅酒店大部份都係包晚餐)，妹夫話都好啦，剛才重以為遲咗就冇得食！有少少嘢食都好過冇嘅，唔飽的話，我哋每人都重有一個杯麵

以前重來都冇帶杯麵去歐洲，自從上次聖誕新年去意大利，有幾日好難揾餐廳食飯後，今次就帶定杯麵傍身！

20:11酒店～Pension Theiner，老闆話架車唔好泊門口，門口車位留比酒吧客人

上房間放低行李先，都幾新淨

20:28餐廳坐低，果然係有湯飲，好大碗

妹夫話個湯係Gulasch即牛肉湯，好濃好飲喎，諗起在匈牙利🇭🇺飲過，係鹹咗少少

剛才話冇晚餐食，嚇得我哋吖！值得啤啤佢，餐廳其他住客開始食甜品

唔通晚餐就個牛肉湯同連一盤麵包❓

有個餐牌睇，餐廳叫咗個已收工的女職員返嚟，同我哋介紹餐牌，呢個女職員英文好好多

我諗呢個係酒吧小食餐牌，Gulaschsuppe應該係Gulasch牛肉湯，都要€6一碗，因為冇咗晚餐MainCourse食，我哋覺得要叫最貴嘅(網上見啲食物個樣都幾靚，有牛扒、魚食)，好似冇咁蝕，就叫咗兩個最貴火腿併盆€9.8＋2個€4.1Pizza(其實而家唔係好肯定係咪叫最貴嗰2樣，總之係比較貴)

兩個火腿併盆，又再加一盆麵包，嘩！都幾多喎

重有2個Pizza

其實剛才女職員同我哋落單時都有啲懷疑，我哋叫兩個火腿併盆食唔食得晒❓但諗住2位司機都肚餓，但我同細妹飲完個湯都飽咗一半，呢餐一路食一路講笑，都話咗唔好貪心啦，叫咗又食唔晒，又唔想比職員知我哋食淨咁多喎，又唔想浪費，就盡量食多啲，火腿併盆其實一份就夠食，呢餐真係笑爆嘴😄，亦估唔到份量咁大

最後⋯唯有將食唔晒的火腿夾麵包，再包好，費事食淨太多好肉酸，但細妹第二日竟然將佢自己嗰份留咗喺房，比佢激死！

職員問要唔咖啡同甜品，女仕食甜品有多個胃，就要2份甜品，4杯咖啡

甜品唔太甜，又幾好食，早知要4份啦

第二日Check Out先知，原來4杯飲品同4杯咖啡係要收錢(唔記得咗歐洲餐廳嘅飲品係要另計)，早知4杯咖啡唔飲啦，好彩冇瞓唔著

21:26我哋係最尾一枱走