第二日－集集、日月潭

2014年5月1日

噖晚夜瞓，今日08:55 先食早餐，主要都係食麵包，費事出去食，食少少就算

10:55  到集集火車站，冇乜特別，順路又有時間，所以到此一遊

其實可以去日月潭先食午餐，行行吓見到內巷甕缸雞，呢間都係餐廳表內之一，甕缸雞喺清境都會食，但妹夫話食咗食先啦，好食清境再食，好⋯為食一族，開餐

內巷甕缸雞－集集火車站隔離，好易搵

11:37 就食午餐，太早，坐低時得我哋一枱客

每次去台灣都會食雞，因為好食，老闆切開半隻，半隻手撕

附雞汁，皮雖然唔係十分脆，但肉嫩有雞味，好食

其他小菜一般

之前冇影全隻，補影

13:23 到玄光寺碼頭

強國人排隊影日月潭個牌，都算守規矩

原本想去慈恩塔影日月潭全境，但好多人，遊咗湖先

是但問咗一個工作人員，買飛上船

去伊達邵碼頭

小食街

燒香腸比較肥，重飲咗呢度出名嘅阿薩姆紅茶，味道同其他紅茶唔同，幾好飲，可惜第二度冇

年記香菇包，幾好味

買時得番幾個，賣晒就冇

行咗一個圈就搭船去水社碼頭行吓，雖然今晚係住水社碼頭，但反正比咗錢嘛

老公同妹夫冇位坐，佢哋喺船尾，坐坐吓，妹夫叫咗細妹過去，細妹返嚟同我講，叫我冷靜D，原來老公剛發覺唔見咗個隨身袋仔，吓⋯⋯！！＠~＠

唔見咗D乜？幾時唔見？老公話大部份台幣重有港幣，重有證件，全部都放喺個袋仔，應該漏咗喺酒店⋯⋯唉！！！一到水社碼頭，妹夫即刻打電話到酒店，一打去酒店，酒店就知喇，原來酒店今朝已經留言比我，係我冇留意

即時搭下班船返去玄光寺碼頭，反正酒店已Keep住證件，錢如果唔見都唔見咗，有證件就得，我話不如去埋慈恩塔

妹夫話，都係攞返證件安心D，咁好啦，返去攞證件先，買個阿婆茶葉蛋上車食，就返轉頭去台中酒店

日月潭玄光寺碼頭，水色唔錯，都算乾淨

大約4點開車，要揸1個鐘多D車程先到台中酒店

到博奇酒店，睇咗袋入面有我哋2個證件，多謝工作人員就走

開車離開酒店，睇吓有冇少到錢，其實重有幾多都算㗎喇，係老公唔小心嘛，點知⋯錢全部都冇少到，真係Very Good

對呢間酒店加分，對台灣人更加加分

估唔到一向小心謹慎嘅老公，今次竟然咁大意，以後應該唔會咁大聲話我冇記性，點知老公重話我唔提佢喎，成日話我冇記性唔小心，不嬲都係佢提我㗎啦，重好意思話我

今日中午早食飯，所以我就提議去上次食過嘅三媽臭臭鍋，浪費大家咁多時間，所以我哋請，任食呀⋯哈哈

噖晚見過有幾間，兜咗一陣妹夫就望到

18:04 魚頭鍋、臭臭鍋、泡菜鍋、南瓜鍋，加咗三樣餸，細妹佢哋第一次食，都話唔錯，好抵食，味道又唔錯，性價比高

有汽水涼茶飲，今次加咗價，白飯唔係任裝，新加有雪糕食，不過唔好食，但重想點，呢餐NT600咋

食飽開車去日月潭酒店，今晚係經Agoda 訂嘅，途中，Agoda 就打電話嚟，問我哋幾點到，都比晒錢喇，又會打嚟，去到先知，夜D酒店係冇職員喺度

老公和妹夫去泊車，我同細妹攞房，職員話日月潭呢度全部都要泊大停車場喎，我覺得係細酒店同民宿先係咁啫，不過泊車都唔貴，NT200 一晚

20:17 房間都幾大，同睇相差唔多

廁所就比較舊

老公唔係好滿意，問點解揀呢間，唉⋯都話遲決定嚟台中，今日又係5月1日假期，好多酒店都冇房，重有嘅都好貴，是但啦，一晚咋嘛，而且呢間地點都好方便

20:46 休息一陣就出去，都唔係好夜，好多餐廳都閂門，我哋想搵間餐廳食吓嘢都唔得

旅店嘅另一邊

生果NT100／3盒，老闆娘送多一盒芒果，可能切開咗唔留得太耐啦，就送多一盒，另買咗炸雞同啤酒

日出乳酪蛋糕，附一條線，可跟圖切，好味，但兩位司機話太軟又唔夠凍，梗係啦，今朝到而家成日都冇雪到，雖然唔夠凍，我同細妹都覺得好食，細妹最後一日重買咗個返香港添