台中日月潭、清境自駕，台北

3月原本想買Package復活節去台中清境加谷關浸溫泉，但時間比較遲，又貴，老公話不如年尾先去，叫我得閒Plan定

4月2日，見到華航機票平，上網時5月頭好快冇特價，見到4月30日出發重有平飛，可以連埋勞動節加佛誕，打電話比老公，老公忙碌中，話請4日假都可以，去唔去我決定，就咁⋯我就即時上網買咗機票⋯ hehe，2個人連稅3千，可能都係平少少啦，但唔夠一個月就出發⋯開心

4月9日，酒店都訂晒，同細妹講開，佢話都諗住5月去台灣玩，咁我話不如一齊吖，細妹話驚搞唔切，我話最緊要有機票，其他酒店行程我搞就得，即日上網睇機票，2人已經貴咗幾百，細妹話同妹夫商量，天日再決定


第二日，細妹決定一齊去，機票貴咗好多，2個人要4千多，我話好唔抵喎，不如都係算啦⋯⋯但細妹仍然想一齊去，因為高興D，一齊去佢唔使Plan行程，咁我話你哋最好申請埋入台證先，冇入台證有機票都冇用，反正你哋都打算5月去台灣，申請咗先

即日，當細妹搞好入台證後，睇住華航機票係咁加價，加到2個人5千幾，因為已經冇晒7日機票，咁細妹諗住坐長榮到台北，再坐高鐵去台中會合，但長榮亦由3千多加咗價(唔記得幾多錢，因為當日太混亂)，細妹亦問過Agent，重貴，我哋都話只係差一日，一日咁多⋯就差咁遠

我話⋯重有方法嘅⋯就係坐廉航，香港快運2個人連行李什費3千幾，快運我哋半年前坐過，唔係好鍾意，3千幾比我坐華航貴幾百，不過係冇飛機餐同網上劃位囉，細妹同妹夫商量後，都唔介意坐快運，話只係一個鐘機程，冇所謂，搞咗一日，傍晚買咗機票，最後都可以一齊去玩

但係，我哋4個人係唔同航機去，唔同時間返香港，因為玩完台中，老公想去台北食吓嘢，所以我哋會住台北2晚，細妹2人就台中玩完就走，一來妹夫唔想放咁長假，二來快運唔可以台中入台北走

遲決定去台中，清境民宿都幾Full，想住嘅已經冇房，加上細妹遲個多星期先決定一齊去，清境有一晚大家住唔同酒店，其他都一齊，但台北想住上次嘅新驛就冇晒房，住JustSleep比較貴，但平少少又好似冇咁大同乾淨，最後都係貴少少算

再一星期後，細妹話見到新假期，講4、5月台中係睇螢火蟲季節，東勢林場重好多螢火蟲⋯⋯

原本第一晚住台中，第二日開始租4日車，但睇螢火蟲冇車唔方便，之前見網友話台中機場冇得攞車，行程得第一日可以去睇，咁點呢⋯細妹又好想睇⋯⋯加上我話上次喺沙巴睇過好靚，細妹話佢冇睇過⋯⋯

最後發現，格上喺台中機場剛開咗取車點，太好！所有問題都解決，第一日機場攞車就去東勢林場睇螢火蟲＾＾

今次細妹同妹夫話跟團⋯哈哈，因為酒店行程我搞，租車老公搞，連國際車牌都係老公幫妹夫去申請，所以老公話－

我係領隊
老公同妹夫係司機
團友只得一個，就係細妹⋯⋯哈哈

原本冇咁快買相機，不過既然去旅行，老公就買咗部 
Canon 6D , 希望影到星星、雲海、螢火蟲