再住隔離酒店

 

2022年7月回港，再次住隔離酒店，不過今次好啲，隔離7日，比上次回港隔離21日，自我安慰已經可以接受 (當然重係要隔離21日係 唔 會 返⋯住，試過一次重唔夠咩！）

老公PCR Test 噖日好遲先收到，網上Check in 時已經要分開坐，只好去到機場同職講，加上朋友話機場安檢好多人，預早4小時前到

比上次2021年12月返香港，今次Check in 安排冇咁混亂，不過班機都係好滿，職員話冇辦法我同老公一齊坐，要分開前後座位，冇計啦，噖晚遲咗Check in

重有時間，T2有Lounge， Priority Card 可入去，曼城機場個Lounge唔多嘢食，但人唔多可以坐一陣

好在之前同老公在機場Lounge食咗早餐，多數飛機餐我都會食得落，不過⋯國泰今次嘅飛機餐，食咗一啖就放棄，豬肉～又老又冇味，煲湯豬肉都好味過佢，加啲辣椒醬上面就算，真係難食，但我左右兩位嘅乘客都有食，因為肚餓？

今次因為係早機，完全瞓唔到，因之前歐洲返香港多數夜機，食完飛機餐一陣就瞓，呢2次都係坐國泰返香港，上次中午機都瞓到一陣，今次完全冇瞓到，睇咗5套戲(未試過睇咁多)，反正住隔離酒店，7 日都係食同瞓

今次只要做完快測就可以去等酒店巴士，好過上次等3小時有測試結果先可以走

但等酒店巴士等咗30分鐘，上車後我哋酒店係尾站，坐咗1個鐘有多先到酒店

 揾咗好多間酒店都滿，今次只係7日，細啲都冇所謂，只要係九龍區都可以，最後住觀塘帝盛

8點左右落機，去到酒店房都11:37， 都唔知點解咁慢

Check in 時職員話Upgrade我哋間房，入到房真係有驚喜，係套房

訂房時我哋要求2張床，所以將梳化加床，係咪呢個原來Upgrade？

房間有雙人床

因為時差，有時瞓一陣就醒，有時又會瞓唔着，老公要瞓覺時，我就响房煲劇，唔影響大家休息，上次隔離住如心，老公半夜醒咗會去廁所睇手機，今次有套房真係正！

呢間房上網睇要差不多2千一晚

我哋飲好多水，6支1.5 升，飲完要加要錢，後尾問話唔使錢，6支唔夠我哋飲

浴室夠大，房同廳都有門入

觀塘帝盛唔算新，但都比上次住荃灣如心乾淨，但都要清潔吓

去到第一個午餐，肉好少味道又差，差⋯未算！

求其食啲落肚，好攰，要瞓

以為晚餐好啲，太天真！意粉加幾片白汁火腿、薯仔沙律

第二日早餐～有豬扒腸仔，好似唔錯，但餐包同豬扒⋯

呢餐算多肉，味道淡淡哋，食得落

發覺午餐係飯，晚餐就食意粉，飯有時都啃得落，晚餐嘅意粉冇一餐好

蒸雞咁多餐嚟講算好味，午、晚餐都有唔同水果，呢樣都OK

呢日係星期五，Happy Friday有下午茶送，原本係菠蘿包，好耐冇食過菠蘿包，但咁耐冇食都覺得唔好食

晚餐，又係幾片肉加意粉！

呢個好似係吞拿魚包

西炒飯都係冇乜味道

有牛角包🥐，好似唔錯，但當然唔會再有期望

豬柳漢堡點解唔係煎蛋或者炒蛋？

洋蔥豬扒，呢個係食得落

真係好過份！

食物我覺得重衰過竹篙灣，不過如果訂唔到呢間，再差嘅都要住，呢間起碼Upgragde有套房

今次時差嚴重，有2、3晚瞓唔著，上次如心好好瞓

好在屋企人有物資送嚟，食杯麵、叫外賣，7日好快過，放監日中午，即刻去食海鮮

下次返香港唔使再受呢啲苦！阿門！

拖咗咁耐，最後決定打呢篇，除咗忙、懶外，隔離生活～想忘記又忘不了！