竹篙灣、荃灣如心酒店隔離21日

 2021年12月24日

而家返香港係好、好煩 ! 航班隨時取消，有機位重要有隔離酒店，上機前又要做PCR檢測，返香港要隔離21日，21日已經難頂，未算！訂咗21日隔離酒店之後⋯改咗落機後強制去竹篙灣隔離4晚⋯竹篙灣 !

朋友話我哋返到係好彩，因為溶斷機制，4人中招就停航14日，我哋班機有7個人中招，即時停14日，朋友佢哋比我哋遲2星期回港，改咗幾次機票，以為1月6號飛到，做咗檢測，上機前的朝早，通知取消，如果同我哋一齊返咪好囉！

之前係買咗BA機票回港，回港一星期前收到通知取消，好彩買到國泰同日機票，不過就由夜晚9點機變成朝早11點機，航空公司要求06:30到機場，所以之前一晚住機場酒店

之前諗住平安夜返香港隔離都唔慌多人，21日⋯聖誕、新年都喺酒店隔離中渡過喎，應該冇乜人㨂呢個日子

可能係好多航班取消咗，當日班機都好滿吓，06:30準時到，已經有人排隊，人排我排，其實都有啲混亂，排咗一陣見有個似高級啲職員行嚟行去，有人問佢，先知排隊唔係check in，係 check 文件先，唔怪得咁慢，噖晚我哋 upload 上機文件，我完成✅，但老公唔知點解未完成，當排到我哋時，另有一個職員幫手即場再upload ，完成upload 文件，先會比個座位

1）首先 check 文件～上機前的檢測報告、檢測中心的ISO 證書、疫苗證書、訂隔離酒店記錄等

2）做檢測～即場快速檢測，要等30分鐘出結果 (之前自己揾檢測中心做，機場又要再做🙄)

3）檢測有結果後，排隊寄行李，出 Boarding pass

之後入閘，只用20分鐘排隊買早餐連食，排隊時間多過食嘅時間

4）過機檢查手提行李，check 得好仔細，我同老公隨身行李都摷晒出嚟，用咗唔少時間

打仗咁，做完以上程序都差唔多10:30 夠鐘登機，想行吓Duty Free，怕誤時，都係早啲去到登機閘口算，點知去到先知Delay ! 應該係有啲人未做即場檢測就寄行李，剛才見到有人寄行李先知要做檢測先，又排過，都話混亂，職員唔夠，指示唔清晰

排隊時同啲同機人傾偈，有夫婦買BA同維珍都取消咗，有個男仔，之前2班機又係取消咗，延遲咗幾日飛，做完檢測過咗期，要再做，又要通知隔離酒店改入住日子，所以～我哋煩得嚟都算好彩（因為唔係買，係用Asia Miles 換，咁嘅情況下重換到係幾神奇，但比機場稅嘅錢同我買BA機票差不多，蝕咗就真，好在之前出發換咗張商務，Asia Miles 而家都唔知幾時用到，有啲今年到期，今次用到都好）

呢個飛機餐真係比較差，唯一麵包係暖，甜品係Movenpick雪糕(冇影相）

早餐好少少

飛機8點20分降落香港，之後一路行，去機場某位置 check 文件(上機前的檢測報告、疫苗證書、訂隔離酒店記錄等)，之後行去做完檢測，再去一個位置(似考試場，一個個位咁，當然隔1.5米距離)等報告，等到1點先有報告!

攞行李上車，當然消毒晒先上車

13:55 到竹篙灣，傳說中的糟糕灣，估唔到會入住 !

分批落車，之後有 工作人員講解吓

14:31 終於入到房，比想像中乾淨

入到去發現得一套被鋪(全新)，補送的一套係舊，舊嘅反而重好，因為張床單有橡筋，新嘅就咁一塊布，成日移位

床褥好薄好薄，透明膠套寫明唔可以除下，床單冇橡筋加膠套，真係好易移位，想像吓瞓上去有幾嘈🙉

洗面盆冇熱水

枕頭薄到紙咁，問攞多個話冇貨！通常咁扁我瞓唔到，床褥枕頭都好差好差，但因為太攰，執一執嘢，沖完涼就瞓咗

每人一袋，除咗盒裝飲品，全部都好難食，呢袋嘢相信係比來港的菲、印傭

因為係喼中喼返嚟，所以冇準備太多，只買咗零食、餅乾、咖啡，兩支細酒，好彩有電視，我哋自備娛樂，唔睇YouTube 煲劇唔知點打發時間

6點多送餐，放在窗口，覺得似在監倉

餐可以㨂，但要第二日先會跟你所揀送，呢幾餐就隨機送

今晚只送一個晚餐，追問後約2小時補回，飛機餐同竹篙灣隔離營飯盒一樣都係國泰出品，隔離營飯盒的飯份量多，餸少

食完晚餐，9點多又瞓

第二日的早餐，二個炒麵，真係好似飛機個早餐

聖誕日，有禮物🎁，每間房都有

比噖日入營嗰包好好多，見隔離房一個人都係咁大包，我哋二個都係一包，太少，真係想問可唔可以要多包，餅同朱古力平時都有買嚟食

平時飛機餐都食到，以為隔離營嘅餐難唔到我，真係太年輕了! 肚餓都要食，維持生命

一餐差過一餐，餸又少

當肉份量多時，唔係雞胸就係牛扒，又老又「鞋」

有一晚老公實在肚餓，問有冇合味道杯麵，竟然有喎，我個人有時好怕濃濃嘅味精，我冇食

雞胸薯仔，對薯仔敏感，只食菜同雞胸，雞胸非常「鞋」但都要食，因為肉飽肚，維持生命

呢日嘅早餐算好

住竹篙灣好處係唔使錢，慳返啲 (之前以為要錢)，返香港成本好貴

12月28日離開，等上車時同見到機場傾過偈的夫婦，話睇fb如心酒店食用唔錯，希望啦，點都好過糟糕灣

我哋14:30上車，應該算早的一批，排隊的竹篙灣營友等旅遊巴車去另一間酒店

15:35 到荃灣如心酒店，要住21晚，所以㨂大間啲，而家都17晚，市景房冇海景，之前睇相幾新淨，原來都舊舊哋，傢私保養差，窗口有2張木椅，旁邊有座地空氣清新機

$1340/晚包三餐，之前問過月租，大約13-14000，一做隔離酒店就貴咁多，雖然包三餐啫

好多清潔用品

蒸餾水4.5 有2大支，飲完可補充，我哋差不多每日一支，老公飲好多水，加上酒店抽風好勁，我皮膚好乾

咁多清潔用品就係要自己動手，我哋清潔咗1小時，因為覺得唔係太乾淨

2份餐具，夠環保，讚👍

共3袋物資，出前一丁杯麵、梳打水、薯片

第一晚晚餐～三文魚幾好味，但隔幾日再食第二、三次，已經唔想食，唔夠熱就腥，晚餐有生果，橙或蘋果

早餐冇食過腸粉，晚餐冇食過意粉，日日白飯，轉吓炒麵、意粉會好啲

餐單上嘅果汁同咖啡，原來係呢啲！真係諗多咗，以為真係Staycation 咩 ! 牛角包、火腿、腸仔係最好2個早餐，隔日出現

香矛豬扒好食，豬扒多數都ok，菜心都好，可惜只出現過3次，肉比竹篙灣多，盡量食晒啲肉，飯食少少，21日隔離，真係肥咗唔少

除夕下午送嚟二個 Cup Cake ，但老公生日就小小心意都冇，有啲酒店好細心，真係冇比較冇傷害！

隔日會有下午茶點心小食，餐單冇嘅，點解唔大方啲每日都送，又唔係多，雖然有隔離酒店冇下午茶，如心都算隔中有，但有酒店日日都有

呢個似迷你老婆餅，最鍾意呢個

12月30號的早餐麥皮+2件細丹麥酥，食完都唔飽，好在親友有送物資，重有杯麵

1月1號早餐係粟米片，元旦早餐諗住好啲啦，冇之外，仲得一早餐份，忍唔住打去話以後唔食麥皮同粟米片，原來可以喎，重叫補返一份早餐

送上嚟嘅竟然有蝦餃燒賣同中式包，仲有生果添，收貨，但得呢日咁正咋

中式早餐食過3次，粟米雞絲粥+珍珠雞

牛腩出現3次，好味，但肥膩

雞扒常常以唔同嘅汁出現

葡國雞汁ok， 但雞肉太淋

鳳爪排骨飯幾好，係油啲

老公唔鍾意食呢個齋， 都食過2次，我ok，當減肥，不過真係好快肚餓

龍脷柳係最差

17日隔離，重覆食以上嘅餐，睇fb 有人話某啲酒店好難食，全部叫外賣，我哋都叫咗2次Foodpanda，雖然如心味道ok，但如心話晒係大酒店吧，應該再好啲，而且日日咁食，不停輪迴，食到都冇心機諗隔離完出去食乜，真係冇乜胃口想食嘢，真係懷疑人生！重有⋯1月頭隔離時知道，隔離完出去晚餐都冇堂食！

每日派的飲品，我好少飲，老公間中飲，我哋飲茶多，親友送咗茶壺同茶葉到酒店

1月14號出關，離開時影門口，張膠櫈係放每日送餐及親友送物資用，開始係每日檢測，後來係隔日，每日都係攞餐、掉垃圾及檢測先可以開門

親友都話我哋好彩返到嚟，我都唔知彩定唔好彩，因為3月頭張機票取消咗，返到嚟，走到嗎！