冰島環島自駕遊行程

事緣，老闆B 2018年6月跟團去完北歐，就話聽團友講冰島🇮🇸好靚(佢一直有留意冰島)，9月份去最好，有機會睇到北極光，話一齊去，佢多數跟團，同我哋去就試吓自駕遊，一年多前就講定，雖然有親戚同朋友去過都話靚，但我一直冇諗過去冰島，對北極光又興不大，可能我唔影相啦

其間老闆B繼續話去冰島，到去完遊輪，再去完日本京阪神，老公話要睇機票喇，一睇⋯好似有啲貴，去歐洲都係4-5千，冰島要7千幾，重要早機返07:30 (時間好差，應該平啲)，後尾知好多都係早機返，冰島物價貴，值唔值得❓真係想縮沙

出發前有朋友話冰島消費好貴，北歐比瑞士貴，而冰島重貴過北歐，瑞士已經覺得唔平⋯重貴過北歐😦！

遲買重貴，最後3月中買咗機票，Finnair芬蘭航空，赫爾辛基轉機

去13日，冰島環島一圈，因為老闆娘只可以去13日，Plan行程時真係覺得唔夠時間玩，冰島環島一圈喎⋯去日本京阪神都8日啦！冰島真係超多景點！但都冇計啦，機票都買咗！去完返嚟，冰島係值得去嘅(Plan時已經覺得靚）


酒店

買咗機票就要定行程，每晚住邊個位置，冰島人口少酒店少，一睇，好多都200歐以上！房間有廁所要100歐以上！我唔想住房間冇廁所，唔方便，貴啲都要有廁所，選擇又少咗！

酒店位置最好近景點，有時近景點嘅酒店唔多，如行冰川附近，因為少酒店，第一間就訂冰川的酒店，166一晚，訂咗2晚，不過之後改行程，已經訂唔返！好似搶咁！再睇附近，一係又貴又唔係好靚，一係貴到2百幾歐重要加早餐每人28歐，加埋300幾歐一晚，最後唯有住遠少少，210歐一晚，好在後來有減價，取消再訂過，都係咁啱166， 又新又靚只係遠啲，有2晚酒店住米湖即時比錢又平啲，比之前睇200歐一晚，覺得可以接受，所以話呢⋯價錢係比較出嚟

台灣網友好多會住Apartment，因為可以煮嘢食，我去旅行多數唔煮，手腳慢！而且冰島景點咁多，留返時間休息好過！(台灣網友好犀利，行程大家都差不多，重可以自己煮)  往時去歐洲住Aparment會平啲，冰島係--唔會平好多，Aparment唔包早餐，計落唔平，但因為有地方多數係Apartment，另外有中間住嘅位置唔係咩大景點，所以酒店少，幾貴吓覺得唔值，所以揀Apartment，最後兩晚諗住行程會輕鬆啲可以住Apartment，點知都係好豐富、好忙！

最後住4晚Apartment，有一間有早餐，已經盡量揀包早餐(朝早趕住出發重要嘥時間整早餐咩)

下次如果再去冰島，除非好多時間Hea遊，如果唔夠時間，盡量揀有餐廳嘅酒店或者民宿，在酒店食早餐、晚餐，冰島唔係周圍有餐廳，景點多，好幾日冇時間食午餐，早餐食飽飽好緊要


餐廳

冰島乜都貴，去餐廳貴食嘢當然貴，飲個湯要100港幣！


可能有晒心理準備，去完覺得係貴，又唔係貴到好嚇人，冰島人口少，遊客咁多，貴都正常，但餐廳食物質素高，好多餐都覺得好食，冰島羊、羊肉湯都好味😋，有幾餐在酒店食，好味之餘計落唔貴，又舒服又慳返時間



租車

最貴應該係租車，5月時經Rentalcars.com在Procar租車公司租咗 Land Rover，12日HK$11,215， 另外Rentalcars買全保HK$1,033，每日HK$1020， 比早幾次歐洲租車5-600一日貴，但租嘅係四輪驅動，冰島嘅路況之前上網睇唔少，個個都話要租四驅車，雖然我見台灣網友租得好平，租車我不嬲冇理，老公同老闆B都話要租架好啲嘅車，所以租Land Rover

老公租車時只睇車同價錢，呢間Procar不在機場，落機要在揾租車公司職員，再車去附近的辦事處，可能因為咁平啲

之後，我睇到有台灣網友在Procar租車，一樣在Rentalcars.com買全保，所以攞車時冇幫Procar另外買保險，到還車時因有碰撞，架車有損毀，Procar先收維修費，筆數大到唔合理，雖然最後Claim返保險，但都蝕差價，睇完，怕還車時有乜損傷，都係費事煩，最後大家決定--取消，Rentalcars全數退回，好好

8月時再租，揾好多網友推薦的Blue Car Rental，之前冇留意呢間，因老公用Rentalcar.com  揀，呢間比較貴，排在後面唔會留意到

可能就出發啦，都知會貴咗，貴咗4千幾蚊

Blue Car Rental租12日車ISK202,540， 加多一個司機ISK9,600，全保ISK46,680，共HK$16,845.50， 主要係全保貴咗，約HK$1,403一日，好貴！老闆B重話每人除開4千幾，唔貴喎！重未計油費喎！(果然係跟慣團的有錢人)

最係租咗Toyoto Land Cruiser，點解唔租返Land Rover呢❓Land Rover只係貴多1千多港幣，唔差在喇(已經貴到麻木咗)，因Land Cruiser大架啲，舒適啲，而且包GPS，但點知個GPS完全用唔到！去到冰島我在機場買咗當地電話卡，Google非常之準確，完全可以唔租GPS，其他3張香港買嘅電話卡都OK，當地電話卡比香港買嘅貴，但安心啲

Toyoto Land Cruiser，我哋之前架車，不過係細版，今次租嘅當然係大版

車廂夠大，後座舒適

二個大二個細喼都有少少空位淨

老公的拍擋係開Land Rover，來接機，後座同車尾箱都唔夠Toyoto Land Cruiser大，行李放到上頂

出發前，我哋架車比人撞尾，拍擋借咗架Land Rover比老公用，揸咗1個多月，所以到冰島即時就比較到二架車，老公就話Land Rover馬力大同定啲，Land Cruiser會溜後，日本車始終唔夠歐洲車好(因為二位司機都係揸BMW）


大部分人逆時針玩，我哋都係

第一日 ~ 雷克雅未克Reykjavik → 黃金圈 機場租車→辛格韋特勒國家公園 Þingvellir National Park→藍色秘境瀑布 Bruarfoss Waterfall→ 史托克間歇泉 Strokkur Geyer #午餐～Restaurant Geysir Gilma (間歇泉)→黃金瀑布 Gullfoss

住宿～Sel Guesthouse及晚餐 第二日~黃金圈 → 維克Vik 雙子星瀑布 Háifoss→水濂洞瀑布 Seljalandsfoss→洞穴瀑布 Gljúfrabúi → 斯科加爾(彩虹瀑布) Skógafoss #午餐～彩虹瀑布旁的炸魚薯條→秘密瀑布 Kvernufoss→索爾黑馬冰川 Sólheimajökull→

海蝕洞 Dyrhólaey→黑沙灘 Reynisfjara Beach 住宿～Puffin Hotel Vik       #晚餐～小鎮餐廳Suður-Vík

第三日 ~ 維克→  Kálfafell 羽毛峽谷 Fjaðrárgljúfur→教堂鎮 Kirkjubaejarklaustur #午餐~Systrakaffi→玄武岩瀑布 Svartifoss→

鑽石沙灘 Diamond Beach → 傑古沙龍冰河湖 Jökulsárlón (預約17:20遊湖)  住宿～Fosshotel Nupar及晚餐

第四日~ Kálfafell → Skálafell

行冰川 5.5小時(預約10:20)→斯維納山冰川舌 Svínafellsjökull Glacier Tongue→ 小冰河湖 Fjallsárlón→傑古沙龍冰河湖 Jökulsárlón (再到) 住宿～Guesthouse Skálafell      #晚餐～Pakkhus Restaurant (赫本Höfn龍蝦餐廳）

第五日~Skálafell → 米湖 Mývatn 都皮沃古爾 Djúpivogur(金字塔形山Búlandstindur)→埃伊爾斯塔濟 Egilsstaðir (Gufu Waterfall) → 塞濟斯菲厄澤 Seyðisfjörður(峽灣小鎮)→黛提瀑布 Dettifoss  &  Selfoss Waterfall  住宿～Laxá Hótel及晚餐

第六日~ 米湖 Mývatn 鑽石圈 克拉夫拉火山 Krafla(火山口湖Viti)→Leirhnjukur 熔岩區→地熱區 Námafjall→ #午餐～Kaffi Borgir    黑色城堡 Lavafeld Dimmu Borgir→惠爾偽火山口 Hverfjall→洞穴温泉Grjotagja Cave   住宿～Laxá Hótel     #晚餐Vogafjós Farm & Resort

第七日~ 米湖 Mývatn → 阿克雷里Akureyri 偽火山口群 Skútustaðir→眾神瀑布 Goðafoss Waterfall→阿克雷里市 Akureyri

#午餐～Kaffi llmur→阿克雷里大教堂 Akureyrarkirkja 住宿～Saeluhus Apartments & Houses      #晚餐～自煮

第八日~阿克雷里Akureyri → Brekkulækur 草屋博物館 Glaumbær Farm & Museum→鯨魚教堂 Blönduóskirkja→海中巨象石岩 Hvitserkur

#午餐～Geitafell Restaurant → 巨人峽谷Kolugljúfur Canyon

住宿～Brekkulækur Guesthouse      #晚餐～Hótel Laugarbakki

第九日~ Brekkulækur → Fossatún Grábrók Crater 火山→Glanni Waterfall→Glymur Waterfall→小地熱谷Deildartunguhver 住宿～Fossatún Country Hotel及晚餐

第十日 ~ Fossatún →  Snæfellsnes 斯奈山半島 熔岩瀑布 Hraunfossar、小孩瀑布 Barnafoss → #午餐～The Settlement Center(博爾加內斯) 玄武岩牆 GeroubergCliffs→布迪爾黑教堂 Búðakirkja→ 一線天 Rrauðfeldsgjá Gorge

草帽山(教堂山) Kirkjufell  住宿～G4 Apartment      #晚餐～自煮 第十一日~ Snæfellsnes 斯奈山半島一日遊 三角形教堂 ólafsvíkurkirkja→Ingjaldshóll教堂→黃金沙灘 Skarðsvík Beach→橙色燈塔Svörtuloft Lighthouse→  Saxhóll Crater火山→黑沙灘 Djúpalónssandur→火山岩洞 Vatnshellir Cave(地心探險) 怪物海岸Lóndrangar→Arnarstapi小鎮(Bárðar Saga 巨人石像)→海蝕洞 Gatklettur 海豹沙灘 Ytri-Tunga Beach →Stykkishólmur小鎮 住宿～G4 Apartment 晚餐      #晚餐～自煮

第十二日~Snæfellsnes 斯奈山半島 → 雷克雅未克 哈爾格林姆教堂 Hallgrímskirkja→哈帕音樂廳 Harpa #午餐～Sægreifinn Restaurant(Sea Baron)→ bbp熱狗→托寧湖 Tjörnin→市中心→藍湖 Blue Lagoon(預約17:00)

開車找地點影極光 02:00還車 第十三日～07:30上機返香港🇭🇰

睇上面行程，景點多到呢！Plan行程每次都預計好好， 但一定唔會100%完成，但今次真係都好犀利， 景點差不多去咗9成，我哋腳程慢，每日又比原定時間 遲大半小時出發，好多日冇時間食午餐，冇計！景點太多 最後一晚原本租咗 BB Hotel Keflavik Airport，因為改租車公司， 就改一改還車時間，因後尾覺得浸完藍湖返到酒店10點，朝早 3點多要起身，瞓得幾個鐘，不如開車周圍兜吓，可能有極光睇， 所以最後取消咗，前後2次(一次以為平咗，諗住再訂)，呢間BB  Hotel Keflavik Airport，明明係免費取消，唔知點解即時過咗數， 取消又退回，蝕咗匯率(2次)，訂呢間要小心！不過⋯呢個決定 好正確，因為嗰晚係幾晚中極光最強，上機前見到咁強嘅極光， 行程完滿，只係，好多日天氣唔係太好，下次要再去冰島🇮🇸。