行程 - 菁英遊輪13晚意大利及亞得里亞海遊

2018年菁英遊輪13晚意大利及亞得里亞海遊

2015年MSC地中海遊輪後，老公一直想再去遊輪，2016年選擇去德國的聖誕市集，誇年由聖誕到新年，2017年因各種原因報唔成名去遊輪，所以⋯2017年去完歐洲，年尾已經留意各遊輪行程

上次係MSC地中海7日遊輪，今次想去較長，希臘同克羅地亞的Dubrovnik都想再去，遊輪重遊地方最好唔需要細意遊，但諗諗吓希臘遊輪去上岸時間太短，希臘應該住山洞屋慢慢Hea

最後已鎖定菁英遊輪Celebrity Cruises的意大利及亞得里亞海13晚遊輪新月號Eclipse，上岸的觀光點有7個，Dubrovnik停2日，有4日Sea Day，今次Sea Day唔會好似上次得一日咁少，都足夠



但呢個行程，我同老公只係未去過意大利的那不勒斯Naples及蒙特內哥羅的Kotor！咁點解會揀呢❓因再去克羅地亞的話，Dubrovnik位置較遠，揸車比較辛苦(下次自駕去到16湖附近就夠)，而Kotor在2015年自駕去Dubrovnik已經好想去，所以冇所謂啦，遊輪唔係細意遊，旨在Hea，好在細妹全部未去過


2018年1月時去咗個遊輪講座，睇吓講座有乜優惠，講座發現菁英在香港有代理，就直接同菁英訂位 (差少少就同某旅行社訂咗位）

同菁英直接訂位有乜好處❓好處係船費每人只需約HK$5000訂金，出發前3個月先要比晒尾數，如果⋯如果想取消，3個月前可全數退回訂金，最重要係～船費如果減價，就算我哋落咗訂，船費都會有得減(之後真係減價⋯好開心😃）

咁梗係直接同菁英代理訂位啦，唔使諗，唔去都完全冇損失！

但菁英當時重未有Package (因為重有大半年)，只有船票，但咁都OK呀，如果見到有其他旅行社平嘅話，可隨時取消去另一間訂

但細妹話驚機票會加價(當時油費同歐元都升)，菁英代理話可以代訂機票(比自己買平幾百蚊)，但機票要全數付款，冇得改，當時諗，最懷打算去唔成遊輪咪自己飛去玩囉

今次機票Open，不過老公同細妹都唔想去咁長，所以只係上船前同落船後各住一晚巴塞隆拿

2017年同細妹、妹夫去歐洲玩，大家都話下年一齊去遊輪，點知妹夫話時間太長行唔開，細妹堅持一個人都要去，點解話堅持，因為去完講座先知，一個人去遊輪係好貴，遊輪什費、港口費及稅項，都係一間房計，即係要比二個人份，我同老公住露台房，可減免二人船上服務小費，細妹一個住內倉房，冇得免小費，以每個人計，我哋住露台房重平過細妹住內倉房，但遊輪唔係人人鍾意，細妹揾唔到人一齊去，冇計，唯有比多啲錢

Celebrity Cruises～Eclipse

菁英遊輪新月號

比訂之後，不時留意菁英Celebrity個官網， 之後真係平咗，打電話去問，最後減咗2次價(好開心😃)，細妹內倉房都有減，但因內倉房較少，只係減咗200美金，細妹話都好過冇啦，雖然有得減價，但原先4項優惠選二，就變咗只可選一，我哋揀免小費，咁船上無限上網就要自己買，船上無限上網好貴，要USD404，但老公同細妹二位大忙人都話要買，點計都平咗，就買啦

雖然平咗好多，不過⋯之後菁英有Package出，重平我哋個價1千2百幾(2個人計)，都算啦，比起訂位時平咗好多，如果當初揾旅行社訂，邊會有得減價，可能重要一早比晒錢，上到船識到由温哥華出發的醫生夫婦，佢哋一年多前報名，係住高一級的Concierge Class禮賓級艙房，但我哋平佢好多，菁英香港代理禮賓房同露台房只係差1千幾一個人，早知就住禮賓房，當初諗住間二種房係一樣大，所以冇揀，下次有咁平都可以試吓