第3日－勝連城跡、泡瀨漁港、美國村

2015年6月28日

 食咗早餐，就喺酒店大堂OTIS攞車，33度，我覺得唔止喎

09:32 攞車都要排隊，等咗30分鐘先到我哋，折扣票淨係買美麗海水族館，海中展望塔喺和歌山睇過，不去也罷，玻璃船睇吓有冇時間，到時想去，許田站買都得

今次係NOTE，上次東京都係呢架

約09:50開車

去勝連城跡，行咗10分鐘IC，¥310

其實今日冇乜行程，可以行國道，但有2個朋友都話車程好長，有個重話由那霸去美國村都要2個鐘，因為冇行IC，哦⋯咁梗係啦，試過由札幌去小樽都1個幾鐘，10萬個燈位，雖然公里差唔多，但時間真係差好遠

而且沖繩IC比較平，就算國道風景靚D，都係行IC算

10:33是經過AEON，好大間，行吓先

噖日喺Naha Main Place買¥2580，呢度貴D

老公個水壺，噖日買¥2480，都係Main Place平

繼續開車去勝連城跡

11:10 見到驚安殿堂，又行

梅酒好平，香港半價，老公好想買，但唔知酒精濃度寄倉得唔得，冇買，後尾問咗人，梅酒酒精濃度低，可以寄倉，之後行國際通激安見唔到有梅酒(但免稅要手提上機，都唔知得唔得，好彩冇買到)

行咗個半鐘，諗住夠¥5000可以退稅

左手邊個肥仔，話OK，可退稅，一個嘟收銀機，一個職員寫退單，一個包好

碌卡時，唔知咩問題，張單簽咗，個肥仔職員又逐件貨品再嘟機，之後取消碌卡張單，又嘟機，再碌卡，其間又搵幾個職員問，諗住大家溝通唔到，見佢都好"呢hea"，費事煩佢啦，我哋只靜靜哋咁等佢搞

最後搞掂晒，先話唔可以退稅，點解？佢唔知點答，淨係講 No Tax，睇張新打嘅單，原來係要退完稅後超過¥5000，而我哋買咗¥5263, 退稅後¥4874，只係差百幾Yen就退到稅

天才 !!! 同我哋講咪得囉，之前另外買咗果汁、芒果乾等都¥825，諗住即時食，所以分開單，求其加一樣過去都夠啦，再唔係叫我哋求其買多樣都得啦，都唔知話佢咩好，只可以講⋯天才 !!!

搞咗20分鐘，嘥時間又退唔到稅，激氣!老公話退到都係好少錢，算啦，而家最驚佢碌過幾次卡，驚收多次錢，雖然即時已經收到銀行通知，但老公話今晚都要打去銀行問過先安心，最後都係冇事，但個肥仔咁做嘢，真係好擔心㗎嘛!

驚安買嘅芒果乾同提子汁都好味，尤其芒果乾(有7D味道，又平好多)，可惜之後去國際通激安搵唔到

13:23 GPS少少失靈，兜咗一陣先到勝連城跡

泊好車行上去

雖然多雲，行上去都好熱好曬

上到去，老公問點解要嚟，好靚咩？睇吓個海囉，多雲⋯所以唔靚啫，而且唔使入場費

我話重有幾個呢D城跡，老公話，冇特別，唔使再去其他

原本想去海中道路再回頭食午餐，但行驚安用咗成2個鐘，早餐老公唔啱食，1點幾就肚餓，咁去泡瀨漁港食飯先

14:02到泡瀨漁港パヤオ食堂

今日星期日，好多人，混亂中只買咗少少魚生¥1362，蝦同三文魚都OK，貝類唔得，冇味

龍蝦餐¥2500，肉質都幾爽，汁好香酒味，但太濃，蓋過鮮味，我覺得OK，但唔抵食

老公就覺得麻麻，話¥5000一隻，不如去容龍食芝士焗龍蝦好過啦，重要係游水添

一場嚟到，點都試吓，所幾食半隻算，睇網友2年前食同而家價錢差成倍，雖然Yen平咗啫，都唔使加咁多㗎


15:22 到海中道路

錯過咗海之駅入口，繼續開車，去到濱比嘉島，影濱比嘉大橋

有龍舟比賽，不過好曬，唔想行過去

15:53回頭去海之駅，冇乜嘢好行

去美國村

16:25見到AEON又行

噖晚便利店買嘅抺茶雪糕¥198，呢度¥98咋，雖然唔同牌子，一樣好味

老公想食炸雞

芝士雪條都好食，白桃啫哩比阿信屋平少少

17:28到美國村

呢度都幾有特色，但好熱，冇乜心機行室外

如果唔係咁熱，海邊食吓嘢都幾好

因為太熱，冇行去沙灘

美國村標誌-摩天輪

對面又有AEON，不過今次唔行咯

行咗藥店，買滿¥5000有退稅，今次好順利，職員好熟手，同今朝驚安殿堂個肥仔差好遠，真係人嘅問題

美國村返酒店，GPS冇帶我哋行IC，好在唔係太多車，行國道30、40分鐘就到那霸

19:20到酒店，諗住泊呢個停車場

去到停車場入口，有職員話要泊前面轉彎個停車場

入閘，以為係香港搭電梯嘅停車場

原來係機器自動泊車

諗起奧地利同匈牙利泊車要15歐一晚，就覺得¥500一晚好平，不過好唔方便


今晚晚餐喺酒店食，Package住滿3晚，送1晚晚餐

三文魚冇乜特別，麵包熱熱哋，好食，但個湯等咗好耐都未到，一齊上更好

湯幾好味

好在冇一人食一款主菜，二個都食豬，肉質爽，唔韌唔"鞋"，好食，一塊太少

甜品有3款，好食

呢餐都幾好食，又唔使錢，係份量少D

返上酒店一陣，發覺留咗嘢喺車，再落樓攞

呢種停車場好慳位，可以泊好多車，但好唔方便，攞嘢要同職員講，職員按電腦搵返間車落嚟

因為唔夠錢退稅，所以可以拆開包裝，出前一丁只係比一田大減價平幾蚊，但老公係都要買，元祖雞麵幾好食，似我哋福麵，下次去日本買多D，蝴蝶餅、綠茶粉差唔多半價，抵，咖啡冇歐洲咁平，但都平過香港，提子汁另外買開嘅，好飲，可惜芒果乾喺車，冇相

老公話退唔到稅都好，因為唔使拎上機，可以寄倉，因為退稅包好就唔可以拆，過關時亦可能會Check，要手提上機

呢支CHIFURE洗面膏，網上話幾好用，只係¥460，都唔錯，但都係雪花秀洗面皂乾淨D，不過呢支就冇咁乾，咁平都抵用

美國村買嘅藥，有退稅就要出境先可以拆