坐郵輪～MSC珍愛號

冇諗過一年去2次歐洲，但無意中見到西地中海郵輪珍愛號特價，實在好平，老公原本想年尾或年頭去日本幾日浸溫泉，唔想再放長假，但郵輪⋯由拍拖初期，老公已經好想去，我一直抗拒，覺得郵輪悶，到而家年紀大，今年又Plan咗2個旅行，都唔想咁辛苦，坐郵輪去hea吓都好

西地中海郵輪船上7晚8日，Package另包一晚米蘭酒店，玩足9日，歐洲長途機，當然想玩多幾日，2星期都覺得少，何況9日！老公唔想放咁多假⋯但去歐洲又想留多幾日，今次冇紅日連假，好矛盾

問咗其他旅行社，機票可以停留的話，會貴D，咁既然老公都唔想放太長，呢個啱晒啦

老公考慮咗幾日，實在好平(雖然淡季，去過好多次郵輪船友都話平)，都係忍唔住，報名^^


機票＋1晚米蘭酒店＋ 7晚船上，再加錢住海景露台房，每人都唔使1萬(未計船上小費)，咁平⋯所以係坐Emirates，轉機都幾辛苦，但平嘛⋯

上次去愛琴海，今年復活節去阿德里亞海，今次去地中海⋯haha

地中海郵輪珍愛號MSC Preziosa，139,072噸，載客量3,502，2013年首航

每日落船上船時間表

去4個國家，5日落船，西班牙老公覺得治安唔好，唔會自駕遊，今次正好會去，到一到都算係去過嘛

旅行社攞咗本介紹MSC船隊的書

在巴勒摩碼頭影珍愛號全景

我哋間海景露台房

都算大，唔錯啦

廁所雖然唔大，但都可以

水晶樓梯

因為差不多每日落船，船上生活比想像中忙，都好少享用船上設施，老公玩過滑水梯，我怕凍，只浸宅姑池

室內暖水泳池，咁多乘客嚟講，好細

宅姑池有好幾個

室外泳池有2個

小朋友嬉水地方

浸過另一邊滑水梯旁的室外宅姑池

船尾另一個室外泳池

收費酒吧、餐廳

其中一個電梯位置


每日都有中文日報

日報寫每日上船落船時間，明日天氣

每日娛樂節目

重有提每示晚要著便裝或正裝

但其實唔係咁嚴格，船長之夜我哋著到好正式，但發覺有女船友著拖鞋都比入餐廳，枉我重特登買咗對斯文鞋，之後有一餐要著正裝，老公都唔著西裝只著恤衫，職員都比入餐廳，當然，有外國人著得好隆重，但下次再坐MSC，我哋唔會帶西裝皮鞋

第一日上船雖然話3點 Check in，做咗功課嘅我知道其實可以早D上船，早上早享受⋯haha，重可以上船食午餐^^(預多D時間始終安全D)

船上有2間免費餐廳，一間係Buffet，另一間係晚餐，Check in時，船卡已安排好食晚餐嘅餐廳同枱號

2點幾，已經好多人食緊午餐，自助餐廳好大

呢晚係意大利之夜，玩接龍，好有氣氛

餐牌有中文，上船前諗住每一樣都要食，但胃口有限，有時連意粉、Risotto都冇Order

但雪糕同甜品只可揀一樣

雪糕同甜品只可揀一樣，唔係話樣樣都可以任叫咩？但侍應話唔得

之前網友話牛唔好食，但食幾次都幾好食，其他船友都話牛唔錯

魚反而好多時唔好食

老公有時會去Buffet餐廳食Pizza做宵夜，Pizza好似下午就開始供應，一直到零辰2點

Pizza 好薄，好食

另一晚晚餐

有晚有3隻蝦，都幾大隻，驚喜


早餐在Buffet餐廳食

每日都食大量生果

後尾發現早餐可以去餐廳食，有人Services，又唔使好似Buffet餐廳咁多，又唔使自己搵位

有三文魚食，Buffet餐廳冇㗎，可揀抄蛋、太陽蛋


最重要有Eggs Benedict，可惜醬汁味道一般

連午餐都可以去餐廳食，雖然冇Buffet咁多款式，但感覺係好食D

前菜都精緻D

個人覺得早、午、晚餐去餐廳食舒適D，但唔好處係要搭枱，晚餐每晚都係同一張枱，都係同一班人，通常都係同一旅行社報名，都安排一齊

報告時要求2人枱，但冇做到，明明有幾張細枱冇人坐，船友話侍應佢哋懶，費事分幾張枱，要做多D

早、午餐會隨職員安排，就算4個人一齊入，都會比一張大枱，之後都會安排其他人坐，通常中國人都坐埋一齊，好彩幾次都冇強國人搭枱！

亦都好彩，晚餐同枱4個人都啱傾，另外2係個係台灣伯伯同嬸嬸，都好Nice，只係鍾意去Buffet餐廳，唔係每晚落嚟食晚餐

搭枱都有好處，每晚晚餐時，同船友傾吓"你今日去咗邊度玩？"大家傾吓都幾好，佢哋好多都坐過幾次郵輪，問吓意見，下次有啱再去

船上生活好充實，食飽晚餐，有時同船友吹吹水，有時行吓船，返房沖涼，之後就睇Show

我哋晚餐食6點，所以就睇9點嘅Show，如果食第二輪晚餐，就先睇Show後食飯

劇院好大，每晚表演都唔同，不過多數都有D雜技、唱歌等

坐郵輪諗hea，但每日都好充實，早起落船，行景點，食晚餐、睇Show

老公又唔願早瞓，鍾意周圍行，其實都幾攰

Sea Day 呢日得閒D，但一日Sea Day，我覺得唔夠，下次去耐D，希望可以多一日Sea Day

今次旅費平，所以都買多咗嘢

Burberry Cashmere頸巾，香港$4300，米蘭€425，退稅後約HK$3130，好貴，但我覺得靚，而且可以用好耐

每次去歐洲，都想搵到AIGLE，之前2次都冇去法國，香港已經買過幾件，9月時我先買咗一件粉紅色褸，今次旅行都有著，好彩去馬賽見唔到，唔係就激死

到馬賽當日，朋友通知AIGLE減價，可惜顏色只剩深色，選擇不多

老公已經好多褸，但都再買，唔係Gore－Tex，係Waterproof 香港$2280，退稅後$1360

我件都係Waterproof，香港$2480，退稅後約HK$1200，一直想買多件去旅行，但呢件去旅行就太沉色，人多失散就難搵

鞋⋯出發前一個月老公買咗同一款但唔同色，都重未著，已經等到有8折先買，但都要HK$1600，馬賽退稅後HK$930，老公話買多對溝淡佢，我又買(其實我都有幾對Gore－Tex鞋，但平嘛)

4樣加埋約HK$4400，香港一件褸都3千，1個字～好抵

老公成日話銀包袋爛信用卡，想起之前用LV銀包好似卡冇咁易爛，就叫老公去睇吓，第一日到米蘭行過冇買，上機前再行米蘭，終於買咗

我冇諗過買，因我的LV銀包還新，店員開頭拎D色彩豐富比我睇，No啦，之後見到呢個款靚得嚟又低調，老公話比男裝銀包抵(因為大個D)，又買咗! 香港$5450，退稅後約HK$3400

老公銀包HK$4950，退稅後約HK$3050

2盒朱古力在杜拜機場買，米蘭機場買完LA MER，職員比咗張Coupon，有22%折扣，所以老公即刻買支酒

米蘭機場Duty Free買LA MER，比出發杜拜轉機時加咗價，激死！所以只買咗盒Mask

今次旅費平，但都覺得買多咗，我個銀包同鞋可以唔買，雖然鍾意啫，都唔會即時用，不過唔會次次都咁買，算吧！而且老公話買嘢唔計⋯hehe


超市食品反而買得少，咖啡呢3盒外，重買咗一盒，冇乜時間行

西班牙火腿

坐郵輪去玩，比我想像中好，好忙⋯唔悶，可能西地中海航程日日落船啦，下次見到平都可以再去，最好落船後，再自駕遊^^

MSC珍愛號食方面味道都唔錯，有船友上年坐過MSC輝煌號，覺得珍愛號食物同咖啡都改善咗，咖啡冇網友講到咁難飲

MSC珍愛號～船友有彈有讚，有船友坐過其他船，話有龍蝦食，服務態度又好D，但我覺得意大利船好處係比較少強國人，雖然船友都話今次已經好多，但佢哋行為難頂之中，都未算好差，而且，點都比去東南亞船嘅強國人少，以1萬嚟計，我滿意