等等吓，老公突然同我講，話回鄉証過咗期，吓⋯⋯？！！
老公重話我做乜唔提佢，明明3月返鄉下拜山都知就到期，都話要換㗎啦⋯＠＠
咁點算？即刻打比老爸，記憶中老爸試過，但老爸話要去中旅社搞！老公問附近警察，話皇崗有得做即日証，落馬洲就唔知！
再打比細妹，睇佢到未，如果耐就我哋過關先，等多一陣，細妹佢哋到，話訂咗酒店，酒店唔貴，但長隆都訂咗飛，4個人$1300人仔，哎⋯⋯
大家都係決定過關先，唔得就我照去玩，老公返屋企⋯，但大家都講，中國有錢應該解決到問題啩⋯？
過咗香港關口，搵到中旅個辦理証件個位，但冇人，見到有人等，今日星期日，唔知開唔開？，打電話去問，好在，今日都開工，等一陣工作人員會過嚟，不過講明要$480人民幣，$480一日証好貴，但都比啦，最緊要解決到啫
等一陣，工作人員嚟到就影相，收咗錢後就走，話要等大半個鐘
等嘅時候，見到都有人想辦一日証，但最後都冇辦到，梗係啦，如果我哋只係即日來回，行吓食嘢咁，都返屋企算
等咗半個鐘多D，就做好即日証，老公過關要另外排隊，比較耐少少
11:47 過關後就去隔離停車場攞車，妹夫架車拎去整，今次問細佬借車，但細佬個 GPS 冇更新，成日都搵唔到地方
原本今日行程第一站係去紅樹林，而家咁晏，開車去食午餐
妹夫在大陸做嘢，廣東省周圍走，食過呢間，味道唔錯，今次順路就嚟食
椰子雞湯，好淡，唔得，鵝腸唔錯
碌鵝
魚腩煲最好味
燒雞
老闆娘送的荔枝
妹夫上網搵嘅荔枝園，見到個牌⋯咁舊嘅⋯⋯
問人，話今個星期冇開，已摘得7788，入去睇吓有冇人
真係冇乜荔枝，摘幾粒試吓，都幾甜
淨返嗰D好高同細粒
兩邊都差唔多冇晒荔枝
問附近居民，有另一個荔枝園，25人仔一個人任食
都幾多，呢度主要係糯米慈，好大粒好甜
其實任食都食唔到幾多，好快好飽，加上又熱
買走好似十多蚊斤，買咗30蚊
呢個荔枝園好簡陋，但大粒又甜
細佬架車GPS搵唔到酒店，後尾有好人司機，叫我哋跟佢車尾，真係帶我哋去，大陸都重有好人
18:01 到中山寰星度假公寓
呢個其實係一個住宅，其中一棟做酒店，都係妹夫經過見到，上網搵，因為好平，所以雖然天日去珠海，回程遠，都要住2晚
HK$400一晚，平之外，大廳可以一齊睇世界盃
一間套房，喺我影相時，已經比導遊霸咗，去旅行，幾時都係導遊分房⋯哈哈
套房浴室比較細
套房另一邊有枱同衣櫃
呢個浴室大好多
房間就比較細，不過都夠啦
休息一陣，出發食飯
老公唔記得帶短褲，所以喺酒店商場搵運動店，原來大陸人叫運動店即係健身室，即係冇啦
19:35 GPS錯有錯著，見到間好大間運動超市
快速地買咗短褲，因為要半個鐘先到晚餐地方，打電話去話8點幾9點就收舖
20:19到美味園
店員叫我哋坐房，最低消費300蚊，叫咗條魚都係2百幾，所以再叫2個小菜
叫煎魚餅，唔夠魚肉，變咗虎皮椒，好食，不過都幾辣
脆肉鯇一條7斤幾，有幾種食法
椒鹽骨腩，好食
我最鍾意呢碟蒸爽腩，有2碟，好爽好爽，鮮甜，好好食
重有炆骨腩，呢碟相對差，其實都好食，不過其他重好食
重有4碟魚片，起骨起得好好，魚片少少骨都冇，重來冇食過一D骨都冇嘅魚片，又爽又鮮甜，好味
4個人食咁多嘢，淨係魚都8碟
好努力食，都係食唔晒，將炸同炆骨腩打包
唔知我哋係咪最後一枱走，出面大廳已經冇晒人，唔怪得頭先要我哋坐房，知我哋會遲走
呢一餐我哋4個都念念不忘，實在好好味，好滿足，317人仔抵食
細妹返工，同同事講起，原來佢有個同事都去過，佢老闆重同我哋同一日去添，只係比我哋早去，所以見唔到
大家都話美味園好食
返到酒店沖完涼，12點就開波，食中午摘荔枝，雪凍咗重好味，睇吓幾大粒
半夜第二場波，我冇起身睇，三個波精好嘈，好彩我早有準備⋯耳塞⋯hehe，細妹帶咗好多零食嚟睇波，老公重食炸骨腩添，如果酒店有微波爐就好喇
正所謂念念不忘，必有迴響，細妹同老公都好想再食，諗住再去中山住一晚食一餐
終於中秋假期紅日，細妹11點打嚟，話即日來回去美味園，而我⋯都好想食，所以就決定去
雖然冇第一次食咁驚喜，但都係好好味，所以大家約年尾再去食^_^
再後，聖誕節，4個去從化碧水灣浸溫泉，返香港前又食多次，呢次重帶定個盒，叫多條魚起片、其他全部炸骨，打包返香港，喺屋企打邊爐，真係有D瘋狂^_^
終於中秋假期紅日，細妹11點打嚟，話即日來回去美味園，而我⋯都好想食，所以就決定去
雖然冇第一次食咁驚喜，但都係好好味，所以大家約年尾再去食^_^
再後，聖誕節，4個去從化碧水灣浸溫泉，返香港前又食多次，呢次重帶定個盒，叫多條魚起片、其他全部炸骨，打包返香港，喺屋企打邊爐，真係有D瘋狂^_^
沒有留言:
張貼留言