東歐、巴爾幹半島之旅

原本打算2014秋天去東歐、巴爾幹半島，但2014年年初，老公話2014年好忙，大旅行唔使諗，吓⋯咁要等1年幾先有得去⋯，因為上次2011年去歐洲係秋天，覺得秋天天氣好，去東歐的話，秋色應該靚D，冇計，唯有唔諗住

2014忙到小旅行都係得一個台中

去完台中，老公話不如計劃2015復活節去東歐, 因為唔想請咁多日假，上網睇天氣、睇遊記，因為怕4月落雨多，天氣唔好

2015年復活節同中秋加國慶假期比較，其實只請多2日假，但天氣好景色會靚好多

當時係6月，如果秋天去重有1年3個月，考慮完都係等，決定秋天去

但係，冇幾耐，老公話老細同佢講，2015年10係老闆娘大壽，要返去加拿大同仔女過生日，放2星期假，吓⋯咁等你老細返香港我哋先出發囉，老公話唔可以老細一返香港，佢就放假喎，要10月尾或11月先可以出發

（奇怪⋯老細預知我哋會去旅行，年幾前就講定)

唉⋯咁遲，東歐早天黑，天氣又開始凍，請假又要多D

最後⋯冇理由再等多1年先去，都係復活節去啦，唔使等咁耐，雖然天氣可能冇咁好⋯

為咗唔想再生支節，差唔多半年前就買機票，早買有特價嘛，買咗之後，點知油價大跌，歐元都大跌，遲買唔止平幾舊⋯⋯激死>.<

歐元跌吓買D，跌吓又買D，平均9.3，已經唔少喺手，去多次都夠，所以都算，比一年前成11蚊，都平唔少

好多人會坐多一程內陸機去薩格勒布，但老公鍾意慕尼黑攞車，又可以沿路玩，就決定慕尼黑租車、還車

到1月頭，開始租車，先發現BMW、BENZ，AUDI等車係唔可以揸去克羅地亞等

老公好唔開心，唔可以好似上次咁租BMW，但機票已買，唯有租其他車

出發前兩三星期，行程又改，原本慕尼黑唔住，
但老公話想德國住吓，咁最尾2日就去基姆湖玩，奧地利哈爾斯塔特Hallstatt上次因為罷工只係到一到，冇住到，今次想住，改日子後已經冇房，都係無緣，下次啦

捷克都想去，但克羅地亞好多地方都想去，所以冇時間，留返下次有緣

今次行程會去奧地利維也納、匈牙利布達佩斯、克羅地亞、斯洛文尼亞、德國基姆湖，玩20日，全程自駕

希望一切順利，天氣好