2016 -17 聖誕市集德意遊

2015年坐MSC遊輪去地中海， 覺得好正， 諗住2016年年尾再去一次遊輪，

3月去完台灣，䦕始Plan行程，老公話...人一世物一世，應該要去歐洲過一次聖誕節...好想去聖誕市集， 咁...我話...不如過埋年，一於誇年啦 ， 咁...最好遊輪+自駕遊，年尾歐洲遊輪又平，正！

但等待期間，計過行程，坐完郵輪落船後再去德國聖誕市集， 要12月頭出發，如果再誇年的話， 要成4星期，老公話唔可以去咁長，見到機票好平， 忍唔住手買機票， 就放棄遊輪，12月中出發玩到1月頭， 一共19日，  因為誇年的話老公可以喺歐洲過生日


行程大約定咗去德國同意大利，買機票時飛德國，米蘭走，比米蘭來回貴7千，所以揀米蘭來回( 但原來加多一程轉機就平好多)，今次要就德國聖誕市集時間...又想去意大利4大城市，車程都幾長...重有Outlet想去呢...

上次遊輪去過意大利幾個地方，但只係到一到影相，所以今次想再去，上次羅馬得一日，梵蒂岡都係影一影相就走，但去羅馬比較遠，想放棄...又想一次過去晒意大利4大城市，唔去羅馬行程就冇咁趕，好矛盾...掙扎好耐，決定都係趕少少，因為我哋覺得意大利一定有機會再坐遊輪去，景點去唔晒就下次（其實羅馬都應該會再坐郵輪去，但又唔想放棄）

旅行主要去玩，Plan時都知唔可以細意遊，不過...購物都要有少少 hehe...所以Outlet都要去，尤其歐元平，佛羅倫斯Outlet 25、26號唔開（好可惜，呢個Outlet好大好好行，朋友比我早1個多月去，買咗好多），米蘭Outlet 1號都唔開，2個Outlet都去唔到，撞正聖誕新年假期冇辨法！所以加一個斯圖加特Outlet，但斯圖加特保時捷車廠就去唔到，連埋去威尼，一共去2個Outlet

去意大利4大城市，應該坐火車較好，意大利坐火車唔貴又方便，加上好多舊城市都有ZTL(限制地區進入)，所以都應該坐火車+自駕遊，米蘭租車，Bolzano還，之後坐火車去佛羅倫斯、羅馬、米蘭，但 Bolzano 24號租車公司冇得還(平安夜休息啩)，羅馬還車都可，但要收異地還車費，考慮到火車多小偷，拉行李又煩，加上聖誕節新年呢D日子，坐火車人多更危險，自駕要租車、油費、高速公路費加埋貴比坐火車好多，但方便...而且去到一D火車去唔到嘅地方...所以最後都係全自駕


出發前三星期先定晒行程，因為老公將住斯圖加特一晚改住符茲堡，網上圖片符茲堡係比斯圖加特靚，所以冇所謂，但酒店店就搵唔到平喇




第一段路由香港去威尼斯，之後去意北山區，再去德國的聖誕市集，Fussen(天鵝堡)、符茲堡、紐倫堡、慕尼黑，再回意大利山區的Bolzano，Bolzano 話係意大利最大聖誕市集

第二段路全意大利，由 Bolzano、佛羅倫斯、羅馬、五漁村、米蘭

Day 1    H.K. → Venice

Day 2   Venice

Day 3   Venice → Outlet → Cortina d'Ampezzo

Day 4   Cortina→

Day 5   Cortina d'Ampezzo → Fussen

Day 6   Fussen → Wurzberg

Day 7   Wurzber → Nurnberg

Day 8   Nurnberg → Munich

Day 9   Munich → Bolzano

Day 10  Bolzano → Florence

Day 11   Florence

Day 12  Florence → Roma

Day 13  Roma

Day 14  Roma → Civita di Bagnoregio → Saturnia

Day 15  Saturnia → Pisa → La Spezia

Day 16  La Spezia → Cinque terre → La Spezia

Day 17  La Spezia →Milan

Day 18  Milan

Day 19  Milan → H.K.