LANLAN TRAVEL: Day 5－郵輪第四天～Valletta 瓦萊塔(Malta馬爾他)

2015年12月2日

06:57 剛開始日出

甲板非常清靜

返到香港，先知老公影咗呢排椅

出發前諗住⋯瞓⋯或者「攤」上張椅上影張相，但一直見唔到，原來老公搵到，只怪當時冇睇老公影嘅相，下次要再去呀

救生艇樓層

救生艇好大隻

角落的露台房，景觀有遮擋

08:12 去 Golden Lobster 食早餐，由Pancaks、Waffles、Toast、麵包、麥皮、脆片等等，呢D自助餐廳都有

唔想逐樣叫，可以揀每日精選，乜都有D，最驚喜係有Eggs Benedict同煙三文魚，自助餐廳冇㗎

可惜 Eggs Benedict 醬汁唔好味

老公揀MSC精選，加煙三文魚

今日到地中海上一個小國家～馬爾他 Malta，郵輪停泊在首都～瓦萊塔 Valletta

09:09 到瓦萊塔港口，但10點先可以落船

碼頭有唔少商店，帳篷係餐廳、咖啡店

當日中午上船食午餐，就在帳篷見到晚餐同枱食飯其中一個女仔，坐喺度飲咖啡上網，佢唔舒服，加上半年前先坐過同一隻船，馬爾他又冇乜好購物，船上上網好貴，就飲杯咖啡免費上網，好多電話卡只用於歐洲各國，馬爾他除外

未落得船，再行吓先

老公話出入港口，都有水警護航，水警船咁細隻？

我哋遲咗少少落船，搵唔到H＆C，大家事後講起，互相搵對方，總知就係見唔到

10:18 跟其他遊客行去巴士站

冇咗H＆C兩個導遊⋯出事了！

諗住坐觀光巴士遊馬爾他€15/人，坐藍色路線去Mdina古城

行去搭巴士，沿路都有包車司機搵客，因為之前2日都有聽到其他船友講，包車都幾方便，就多口問吓幾錢，我聽到係Thirty包2小時，Thirty⋯咁搭巴士都要啦，就同老公講不如試吓，老公話是但啦

上到車再問清楚，司機話係Fifty，吓⋯我咁都聽錯！？咁我即刻話落車，去坐巴士，司機就係咁講，我都聽唔到佢講咩，因為同老公商量緊，老公話都上咗車就算啦，但我明明聽到係Thirty，老公話佢聽唔到，只聽我同佢講30歐，重話包車點會同巴士一樣價，不過諗住係我想試包車，咪試吓囉，而家上咗車，再落車好肉酸喎⋯，吓！

包車雖然同巴士一樣價，但包車得2個鐘，點同喎！反正都未開車，落車有乜所謂啫，老公話係我揀包車，同巴士差€20，係覺得唔抵啫，又唔貴到好緊要，唔想落車

咁算啦(我應該堅持落車！後悔！€20事少，司機手法老土事大)

10:28 影低司機車牌

司機話有幾個景點，我其實只想去Mdina，其他就即管去望望

10:38 以為無咩景點啦？司機車去總統府！

馬爾他總統府真係冇乜興趣，側邊有幾個總統銅像

10:59 第二個停車點，司機景然帶我哋去Shopping！好彩有個免費廁所，當去廁所

真係冇乜興趣

唔係好知係乜，價錢唔平，擺明係遊客價啦，前日在羅馬買咗3個雪櫃磁貼都係€5，店內都有其他遊客，相信同我哋一樣係包車

原本係坐呢架觀光巴士⋯嗚⋯

第一間商店，我哋好快行完，司機重帶我哋去第二間！？重叫我哋慢慢睇，即話我哋第一間太快行完，吓？我哋比錢㗎喎，重想我哋買嘢收佣！

包車2小時，時間已經唔多，重要浪費時間去Shopping，真係「著火」，老公話唔好同司機「拗」，一陣車去山邊放低我哋，重死啦

咁嘅情況，唔買多少唔得，有個玻璃聖誕樹都幾鍾意，但好貴，費事比佢賺(我覺得司機呃我上車)，最後買差唔多最平嘅相架

司機停一停車比我哋影古城全景，老公都冇乜心機影啦

11:17 到Mdina古城

司機只係比20分鐘我哋，梗唔夠啦，嘥晒D時間去購物，講完都係30分鐘，話唔夠時間可加時加錢，梗係€1都唔想再比佢賺！算⋯費事過時有位比佢「昆」錢，激氣 !

呢度影影吓相，見到H＆C，一早見到佢哋就唔會上咗「黑的」

H話今朝可能大家走嚟走去搵大家，就係見唔到對方，總之⋯都係我嘅錯！冇啦啦做乜問價，明明係行緊去巴士站⋯唉

講我哋情況比佢哋聽，唉⋯H重話觀光巴士平咗，€10/人，吓⋯咁我頭先可能唔係聽錯，係睇住巴士價錢嚟「昆」我上車！激死！比你賺錢唔緊要，但最勞氣係得咁少時間行古城嘛！講幾句要走，快D行古城其他地方