LANLAN TRAVEL: Day 2－郵輪第一天～Genova 熱拿亞上船

2015年11月29日

早餐餐廳好多人，要搵位

08:28早餐都幾多嘢食，只係太多人，唔可以慢慢嘆

坐我哋隔離係廣州人，都係上MSC，聽吓其他人如何去熱拿亞碼頭

去碼頭都有幾種方法，通常船公司會安排旅遊巴在上船日，由機場車去碼頭，但今次我哋早一日到米蘭，唔係由機場直接去，所以旅行社就冇安排(除非今日去機場上車，但冇必要浪費時間，而且船公司都收得唔平HK$320/人）

噖晚在酒店大堂，有幾個太太問我如何去碼頭，我話搭火車，佢哋話由酒店行去火車站都幾遠(佢哋年紀係大D)，咁我問佢哋點嚟酒店，佢哋話坐巴士在中央車站落車，有個華人推架車仔，一車4件行李推嚟酒店，收€10，重比咗張卡片佢哋，可以幫佢哋搵車去熱拿亞碼頭

幾位太太即時問酒店Staff，叫的士去熱拿亞碼頭幾錢，酒店Staff話好貴(好似係€400)，重叫佢哋坐火車

之後船上見返幾位太太，話最後打電話比幫佢哋推行李的華人，叫咗一架車€200，€50一個人都OK，方便嘛

咁長氣係想講，由米蘭去碼頭熱拿亞碼頭有幾種方法，有平有貴，就算冇做功課，比貴少少就得，原來由米蘭機場坐巴士到中央火車站，有好多人搵客仔，只係我哋坐火車，加上搭錯車去錯站，冇拉行李在中央車站，所以冇人問我哋

總括有3種方法：－

1)坐船公司巴士HK$320/人
2)自己包車約€400
3) 坐火車€18-41/2人

其實有諗過 4）租車

租車可以去Serravalle Designer Outlet，由米蘭去熱拿亞都經過，只係還車喺熱拿亞機場，要再坐車去碼頭，所以都係放棄

由Ibis Milano Centro去中央車站會經過超市，諗住順便去行，點知個新秀麗喼閂唔到，老公又要執過，搞咗好耐，冇時間行超市，去車站途中，個喼重要爆呔！呢2日都唔係拉好遠，新秀麗好"渣"！

今次真係甩轆，個轆成個膠圈甩咗！

10:54 米蘭中央車站都幾靚，冇乜時間影

月台

11:02坐呢架火車，11:10 Milano Centrale－12:40 Gevova Piazza Principe車站

坐火車時，當然唔敢瞓，意大利小偷多，打醒精神，差唔多落車時，聽到廣東話⋯

到大家預備落車，打招呼，係兩父女，爸爸H，囡囡C，唔同我哋一間旅行社，因為想報名時已滿晒，報另一間，但只淨內倉房，機票一個月，不過囡囡C冇假期，落船後去威尼斯玩一日，遲我哋一日返香港

原來爸爸H上年同老婆坐過MSC同一航線，只係上年坐輝煌號，老婆今年放晒假期，所以爸爸H同囡囡上船

上年上過船，即識路由火車站行去碼頭，咁我話跟佢哋行(有上網睇地圖，知道唔太遠，但有人帶重好)，爸爸H(簡稱船友H)話冇問題

大家傾吓⋯講吓，我話天日諗住留喺船上，幾個落船點，唯一冇做功課就係羅馬，落船碼頭Civitavecchai要坐1個鐘火車先到羅馬，羅馬一日點行得晒，所以老公就話留喺船上hea，船友H就話D蹝喎，咁我就厚住面皮，話不如天日一齊去羅馬，船友H話冇問題，真係好好人，換係我，都未必即時答應，始終剛認識，堅好人(返到香港重有聯絡，講旅行啱傾)

囡囡船友C之前都試過由奇維塔韋基亞Civitavecchai，坐火車去羅馬，兩父女都熟路，放心又安心

之後幾日行程，好多時都同船友H及C友一齊行

火車站側門過隧道，第三行有船標誌，寫住Marina