Day 17 .2－斯洛文尼亞～Bohinj Lake 波茵湖

今日原本行程係去Bohinj Lake波茵湖及Vintgar Gorge文特加爾峽谷，出發前Vintgar Gorge網頁話4月中開，諗住即15號左右開啦，所以先住Bled Lake 2晚

出發後，朋友睇到網頁話20號先開，即係去唔到（Bled Lake行程中我最想去就係峽谷⋯激死！)，不過懶得再改行程，今日就輕鬆D（其實噖日都輕鬆，唔行峽谷，住一晚真係夠）

雖然去唔到峽谷，都去26公里外Bohinj Lake

中途停一停影相

11:52 Church of John the Baptist聖約翰施洗教堂

旅遊書都係咁影

Bohinj Lake

Bohinj Lake冇乜好影，向山開車入去

目的地～Savica Waterfall 沙維查瀑布

瀑布入場費€2.5，不過我哋唔入，因為朋友話要行500級樓梯，好攰外重要沿路風景一般，行500級樓梯只望一望個瀑布，唔值得

所以點解咁想去Vintgar Gorge，當行山，風景靚，重有斯洛文尼亞最大瀑布，可惜今次冇緣去！

唔入場，就喺出面影吓相

離開Savica Waterfall向Bohinj Lake方向回程，見到呢牌，停車，行入民居

好快搵到呢條河或者溪，呢個位置係朋友介紹，見到朋友影相都幾靚，但今日天氣唔好，當然冇同朋友張相咁靚

水都幾清

14:48返到Bled搵位停車

呢度應該係遊客中心，見到Park Hotel，就附近搵位

因為要去Kavarna Park食Kremsnita (Cream Cake)，雖然噖日下午茶＋宵夜已經食咗3件，但最好食同元祖係在Kavarna Park，而餐廳Hotel Park附屬餐廳，所以見到Park Hotel就停車

入到酒店，見唔到網友講的Kavarna Park(應該在湖邊)，但見到有Cream Cake就坐低食

老公叫個三文治當午餐，都幾貴€6.9，食個意粉都得

我就食Cake就夠，果然好食，但可能都係16湖第一次食，夠驚喜，好似都係第一次好食D咁，可能心理作用啦

呢個午餐＋下午茶€16.1，酒店價錢，貴咗少少

食完行吓酒店，行去後樓梯，嗚⋯見到Kavarna Park(左手邊黃色位置，露天位因為落雨，冇人坐)，頭先做乜唔搵多陣⋯

湖邊的Cafe⋯無緣⋯唉

返到遊客中心，有間超市，去行吓

16:54 冇地方去，就去城堡下面教堂～St. Martin's Church 

17:15老公話帶我去佢今朝影相地方，免費停車，見到個牌⋯

跟個牌行上去咪就係Ojstrica，影到全湖景，之前都有諗住行，噖日黃昏，唔想行，今日天氣唔好，費事行，上到去都唔會靚

都係沿湖邊行吓算

超市買咗檸檬啤、薄荷糖，橙一袋€1.2，雖然細個，都幾平，重有一盒咖啡，唔記得影

上Tripadvisor搵想去餐廳地址，因為只記低咗個名，見到呢間噖晚去過

重去問咗民宿個男職員，問佢有冇好食餐廳介紹，男職員寫低地址同名我

但我都係想去原先去嗰間，老公話就去原本想去嗰間啦，就係呢間Ostarija Peglez’n，搵到地址

19:17 Ostarija Peglez’n都幾難搵，跟GPS，行行吓就過咗，返轉頭又唔見，最後要停車行去先搵到，開能開車時留意唔到

去到，話冇位，叫我哋8點半再嚟過

咁我哋諗住返民宿沖涼，再出去，返到民宿，男職員話請我哋飲啤酒，因為佢朋友剛生BB，佢朋友請佢飲酒，係斯洛文尼亞傳統，佢就請我哋飲啤酒，一齊高興吓，其實老公一陣要開車⋯但盛情難卻，就坐低飲少少，大家傾吓偈

佢話多數到Bled Lake幾小時或者住一晚就走，好少好似我哋咁住2晚，我話Ljubljana都幾靚，有機會會再嚟，又講吓斯洛文尼亞經濟、足球等等

我哋噖晚去Gostilna Pri Planincu，之前喺Ljubljana食過斯洛文尼亞傳統菜，舊五花腩幾好味，佢話佢都好鍾食，同佢講我哋晏D去Ostarija Peglez’n，因為太多人我哋先返民宿坐一坐

佢話佢朋友間餐廳係食傳統菜(即剛生BB個朋友)，有五花腩食，餐廳今日都有開，但我哋喺Ostarija Peglez’n留咗位喎，咁叫佢打電話去問吓而家有位未啦，問完話可能要9點先有位

咁既然Ostarija Peglez’n未有位，而佢咁推介佢朋友間餐廳，又話有五花腩食，就叫佢打去佢朋友間餐廳留位

20:27佢重上網比搵佢朋友間餐廳比我哋睇，即係我2小時前問佢介紹餐廳，當時佢已經寫咗地址比我，由頭到尾，佢都推介同一間餐廳

咁我哋就開車去佢朋友間餐廳，行行吓⋯覺得有D唔對路，條路咁熟嘅！去到⋯真係噖晚我哋食嗰間餐廳-_-"Gostilna Pri Planincu

20:36咁⋯入唔入去好？！

我---有Cap圖比民宿職員睇，我哋噖晚去邊間餐廳食飯

職員---有上網比間餐廳我哋睇，咁點解大家都e唔知係講緊同一間餐廳--Gostilna Pri Planincu???!!!

除咗大家英文都唔好，講得唔清楚之外，佢寫比我張紙個餐廳名，同我記低個餐廳名英文位置前後唔同，而佢嘅英文字母亦都相當難睇

我記低係Gostilna Pri Planincu，同佢寫Planinc Restaurant 係好大分別，點估到係同一間餐廳 ！！！

不過⋯既然有五花腩食，而職員又打咗比佢朋友，驚留咗位，唔入去好似唔好意思，我哋咪照入去囉

點知入到去，餐廳職員話冇五花腩食⋯吓？？民宿職員唔係話有咩⋯唔係已經通知咗話會有客人嚟食五花腩咩，餐廳好多客人，餐廳職員話冇就走開

我哋都冇晒心機，冇理由食返噖晚嘅燒鱒魚同燒魷魚，求其叫個燒豬扒

呢個都係豬扒

睇個樣都知唔好食，噖晚都唔錯，今晚就唔得

去旅行我哋都未試過，同一間餐廳連食2晚⋯⋯陰差陽錯，都唔知講咩好！

諗住天日Check out時，一定同民宿職員講，呢間Gostilna Pri Planincu我哋之前已經去過，再去都算，但竟然係冇五花腩食

但佢朝早原來係休息，佢永遠永遠都唔知我哋去咗2次，重要係⋯食唔到五花腩

只好講，無緣食多次五花腩，其實Bled Lake有幾大吖，出名餐廳都係嗰幾間，大家都會錯意，只能說---天意

老公話如果有機會再到Bled Lake，一定要去Ostarija Peglez’n，除咗因為今次食唔到外，咁多人食，應該都係好味