第一日

2013年10月23日

因為只係去5日，所以就揸車去東涌將架車交比老公同事，返嚟就自己揸返屋企，二個字--懶⋯hehe

雖然今日坐12:30 機，但要早D交車比老公同事，所以9點多D就到東涌，老公同事車我哋去到機場，Check in 完 都係10點，Delifrance 食個早餐，去翔天廊行吓 

11:42 要坐巴士上機，未試過坐咁遠，比較細嘅航空公司可能都係咁

呢架機一半都坐唔滿，我冇坐過咁少人嘅機，可以同老公一人坐3個位

飛機餐食豆腐花，都係第一次，不過有得食就食，回程機冇得食添呀，但比返一百蚊我自己食重好啦⋯hehe

 

沙巴天氣一般⋯多雲

到咗沙巴機場，旅行社安排咗車接，不過遲到，等我行咗一圈，重去問人，間店舖嘅人好好人，同我打電話，不過冇人聽，之後就見到接我哋嘅人，旅遊車上好多係同一班機人，重大部份都係住 Shangri-la Tanjung，大家都可能同一個Package

16:08 酒店大堂冇冷氣，雖然有D熱，但環保都係好嘅

Check in 比較慢，但又冇網上話成個鐘咁誇張

6呎床，比屋企5呎大，幾舒服，可惜忱
頭都係唔得

Check in 時想住高層，可惜話冇房，D樹擋咗海景

有晚發覺冇冷氣，打電話去講，職員即刻話係露台門未關好，原來真係未關好，相信有好多人都試過，職員一聽就知，5星級酒店真係比較先進，不過可能係我哋少住5星酒店至真⋯哈哈

坐的士去 Wisma Merdeka 商場換馬幣，之前喺百年換咗少少，因為出入酒店要搭的士，搭的士好貴，每次都要30，

Wisma Merdeka 兌換價比百年平少少啦

Wisma Merdeka 3樓有阿林蝦麵，想食咗阿林蝦麵再食晚餐，但而家5點多D，食完蝦麵晏D先食大茄來又怕晏，因為大茄來網上話最好早D去食，所以老公話不如去早D去食晚餐啦

Wisma Merdeka 行去大茄來，經過劍魚廣場，好多人睇日落，今日多雲，我哋唔睇咯

行咗半個鐘，6點，見到大茄來

魚缸前好多人揀海鮮

等咗一陣先有人同我哋落單，我哋話要食蝦蟹等，職員已經同我哋寫晒份量價錢，我哋重話要食魚，竟然話我哋夠喇，食唔晒，比佢講一講重以為真係食唔晒添，蝦其實我想食大隻D嗰隻，呢個Size就想食多D囉，但落單時好急，好似搶海鮮咁，而且職員都寫咗2隻，算啦，睇吓好唔好食先

可能好多人影相，職員問我影唔影張單，咁梗係影啦，不過原來埋單有另外一張單比你架，其實係可以唔影

椰子布甸，似椰子大菜糕多D，老公問我食唔食得晒，我話食得晒，所以老公再要一個，但原來一個人食再飲桔仔冰，重飲沙白湯真係好飽，成肚水

奶油蝦－OK，不過我唔係好鍾意D汁係甜，香港食一隻豉油王蝦要1百蚊隻左右，呢隻細D，但約港幣50蚊，比香港平

甘香蟹－幾香口，但D汁好濃，搶咗蟹嘅鮮味

辣子扇貝－麻麻哋，抄樹仔菜唔錯，沙白湯超甜，係咪落咗味精？

職員重話夠食喎，我哋重要加多個象拔蚌

雖然蝦汁比較甜，但老公話要撈飯

原本可以慢慢食個椰子布甸，但有強國人等我哋張枱，重坐埋喺度等，重邊有心情慢慢食

大茄來總括來講算平，呢餐RM159，但樣樣都係細細碟，冇網上D人講咁抵食囉，而且出菜超快，好似食快餐咁，可能佢真係好多人嚟食啦，落單時好急，比我慢慢揀會好D，我同老公比較鍾意之後去嘅雙天

去夜市行吓，經過 Center Point 商場，入去望吓沙巴D商場真係可以唔行，見到找換店，兌換價都係 Wisma Merdeka 商場最好

去到一個好多人嘅夜市，好多人，煙霧彌漫，D煙真係好大好犀利

呢檔海鮮好大隻蝦，同老公講咁大隻應該好貴，講完即刻聽到有廣東話答我唔係好貴，原來有3香港人買緊海鮮，佢哋買蝦同魚，見價錢唔貴，我哋都跟住買，原本買下面嗰一排蝦，但上面嗰排重大隻，所以就⋯⋯

見到咁大，老公知我想食，就話買大隻食⋯hehe，睇吓幾大隻

3個香港人叫我哋同佢哋 Share 魷魚，其實我唔想食，不過老公話冇所謂，魚RM20 蝦RM40，魷魚RM7

 

3個香港人係姑姐同2個姨甥女，同我哋一樣都係天日去睇螢火蟲，大家話天日可能重會撞見，佢哋住市中心，喺酒店Book螢火蟲團，比我經沙巴遊BookRM160平RM10,我都有諗嚟到沙巴先Book螢火蟲團，不過始終香港Book咗安心D

重講吓大家食咗咩嘢，佢哋比我哋早一日到，今日食咗幾餐，哈⋯咁嚟沙巴都係主要都係食

講開先知呢度係菲律賓市場，有網友話治安唔好，所以可以唔嚟，估唔到行行吓嚟咗，重食埋嘢添，呢度重有唔同檔口，可

以買飲品，3個港人重買咗燒雞翼，重平過我哋下午食嘅街邊檔，佢哋話呢度出名，重話幾好食，但我哋食完大茄來有幾耐吖，唔食咯

蝦同魷魚燒完好香，雖然唔係游水，但蝦都有鮮味

重有蝦膏添

魚就一D味都冇，3個港人嗰條都係冇味，嚟呢度唔好食魚

隻蝦燒完細咗，不過都係我食過最大㗎喇⋯哈哈

返房前見到有燕子同燕窩，不過個窩應該唔食得

每日返房都有朵花

返到酒店先醒起沙巴遊話到咗要留個酒店房No.比佢，Mail 完之後，時間有問題，負責人打嚟，老公即叫我問吓，不如叫沙巴遊喺市中心接我哋，咁我哋唔使天日去市中心食午餐，之後再搭的士返酒店等，負責人話OK，哈⋯咁慳咗一程的士錢，雖然螢火蟲團2個人貴咗RM20，的士慳RM30，重賺RM10，最好就係慳返D時間嘛，Good