法國、德國購物

今次到法國，雖然冇去巴黎(好多平藥房)，但諗住買法國嘅護膚品應該比香港平，雖然冇用開呢啲牌子，都想買少少(可能朋友去巴黎買到走水貨咁，比佢影響⋯哈哈😄)

之前在Strasbourg史特拉斯堡已經去過幾間藥房，但冇一間齊全，最後在霞慕尼買，比朋友在巴黎買貴，有啲牌子都冇，買夠退稅就算

霞慕尼市鎮

細妹買2支Phyto 洗頭水、1支Caudalie葡萄籽皇后水，其餘都係我的

以下係未退稅價錢，有啲都唔知香港幾錢，有啲比香港貴，不過去旅行買嘢係買得開心，就冇計咁多

Phyto 洗頭水～€12.7/支，用開好用，香港價6折，今次買Densifying Treatment Shampoo (Thinning Hair Women)，呢支以前用覺得甩少咗頭髮，唔知係咪年紀又大咗，覺得冇以前咁有效，反而Repairing Shampoo (Weakened Damaged Hair)重有效，用完又柔順，下次都係買Repairing Shampoo

Caudalie葡萄籽皇后水～€36.9/支，都幾補濕、清爽，夏天用幾好

NUXE Huile Prodigieuse精華油～€22.9/支，之前在Annecy買，早知留霞慕買，咁會有退稅

FurtererRF 5 SENS ~ €22/支，網上話對脫髪好有效用，但重未用過

DARPHIN 橙花精油～€59/支，我覺得呢支最好用，但返到香港發現HKTVMall有得賣，重平好多添！激死！


法國🇫🇷 Mc author Glen Troyes Outlet 

法國出品的LACOSTE，2件T恤都唔夠上次在德國斯圖加特Outlet買咁平，可能款式唔同，退稅後€109，一件約HK$420另一件約$570，AIGLE嗰件約$400，同香港開倉差不多價

AIGLE Boot退稅後HK$740，重平過上次在法國馬賽買百幾港紙，Columbia鞋好平$310，拖鞋唔抵$160，同香港差唔多，都唔知老公點解會買

去法國Outlet係想買AIGLE呢個牌子，但款式好少，AIGLE香港開倉重多款式，只不過勁多人好似搶咁

我同細妹各買2件外套，Columbia外套好平$340，我件係綠色，Columbia鞋$284，雖然平，但防水效果都唔錯

AIGLE風䄛$370，係童裝，所有比較平

深藍色風香港開倉都見到有，法國好似係平少少，不過唔應該覺得平而買，因為我有好幾件AIGLE的薄風褸

德國🇩🇪 Wertheim Village Outlets

LACOSTE 3件T恤€144，退稅後HK$1310左右

 
ecco Gore-Tex鞋€112，退稅後HK$950，老公話呢對鞋幾舒服，平香港好多，老公鍾意咗呢個牌子，另外，買呢對鞋時比Sales叫買咗支Gore-Tex鞋噴霧，買咗都未用過，嘥咗

孖人牌的磨刀棒€14，都係嗰句，有時旅行係鍾意買，買咗都未用過




德國dm藥房、Rossmann、超市

買咗好多零食、維他命C

9個月前去德國都買咗唔少維他命C，今次再買係因為真係真係唔知幾時再去德國，要夠存貨，老公鍾意飲檸檬味，有10支係細妹，因為佢之前買唔夠

後來見Rossmann的維他命C(葡萄🍇味)，有Zinc鋅，所以又買多幾支，咁多維他命C最貴係呢隻€0.99支，有鋅好似真係比較有效，鼻敏感冇咁嚴重

花生🥜€0.59/包，有幾種味道幾好食，反而魚皮花生貴啲又唔好味

橙色無花果乾€2.29/包，返到香港見到"一田"賣HK$44蚊包，貴好多，雖然平過香港，但之後發現阿信屋的土耳其無花果乾價錢差不多，但大包又好食，以後買阿信屋食

湯包重未食(旅行鍾意買，好多時到期都未食）

送禮的酒心朱古力，聽說酒味幾濃，飲酒嘅人比較啱

dm買嘅無花果乾、藜麥、阿麻籽，重有花茶

dm買嘅無花果乾比超市較大包，抵食啲，重係有機，但都係阿信屋嘅平靚正


藜麥、阿麻籽平時都有食，阿麻籽€0.59/包，實在平香港好多，藜麥€3.95/包，如果有機都平幾多，唔係有機就平少少啦，雖然重，都忍唔住買咗，下次只買阿麻籽，平香港好多

呢隻係咳嗽飲嘅花茶€0.7，甜甜哋，傷風感冒😷後飲真係好有效用，平時淨飲咳藥水都咳好耐，加埋呢隻花飲，真係好得快咗，我同細妹都覺得有用，推薦，後尾在科隆再買多盒，買錯比小朋友飲嘅花茶！

綠茶🍵€4.95，得6包唔平，諗住試吓有機，最近先知係Latte，點解當時睇唔到係Latte❓可能以為係自己加奶啩！味道甜甜哋，但我唔鍾意

桃茶上次在意大利買過，覺得幾香今次再買，凍熱飲都得，夏天沖完雪凍，再加少少蜜糖，正

唇彩💄€3.45唔昜甩色，但我唔係太鍾意個味道，遮瑕膏€3.45只用過一次，覺得麻麻，2樣都係網上見到人介紹

推薦dm的Balea Eye Mask～€4.45/盒有3Pad，呢隻都唔錯，薄薄幾貼，另外買咗盒都係Balea的Q10 Eye Mask，Q10質地較厚，反而冇咁好用

卡蜜兒Kamill Hand Cream～酒店送的Sample，當時冇試，以為係之前去德國買過的Herbacin，同樣都係用小菊花標誌，相信好多人同我一樣分唔到係2隻唔同牌子

當晚瞓前試吓，發覺同我之前買Herbacin Hand Cream嗰隻質地唔同，Herbacin質地好杰，呢支Kamill潤得嚟又好推開，不愧為德國No.1

之前在dm想買小菊花潤唇膏，明明好多小菊花產品，就係揾唔到潤唇膏，咁比職員睇我用開嘅佢睇，佢話冇，當時好奇怪，咁就算，後尾知原來dm賣嘅係Kamill牌子，我比職員睇嘅係Herbacin潤唇膏，所以就揾唔到啦，2隻都係小菊花，真係好難分！返到香港上網查，終於先識分別到2隻牌子


左邊係Kamill，右邊係Herbacin，唔為意真係以為同一牌子唔同系列，左手邊係香港買嘅，我諗德國買會平一半

夜晚在法蘭克福酒店附的dm見到有好多Sample，記得好平，好似係€0.5/30ml支，但以為係Herbacin就冇買，好後悔，第二日上機前冇時間再去dm買

返香港後發現在屈記、萬X、莎X都有，最平係千色店減價時，一盒有125泵裝、支裝及Sample

幫朋友買Dr. Hauschka德國世家€11/50ml支，都幾貴，但香港賣200蚊支，平一半

細妹知我幫朋友買，法蘭克福機場入海關前的藥房見到，買咗話好用，咁我上機前買多一支自己用，都幾滋潤同持久，吸收快，所以過一陣後就較乾爽，我鍾意油潤感覺，鍾意Kamill多啲