2015年都係8月先見到MSC地中海郵輪特價，諗住下半年報名都未遲，但到6月，發覺想去的航線 2016有，2017係冇⋯每年未必相同，老公想報上船玩10日的船程，冇啱心水，左揀右揀，終於揀去一個7日，落船後自己再留，點知去到報名，「不安」旅行社話，雖然機票加500蚊/人可選擇停留，但全數付款後，如果我選擇日子冇機位，只可以跟原本團體時間回程(旅行社有Set 好飛機+船航時間，即落船就上機返香港，冇得自己留低！) 咁...梗係唔係報名啦，船程已經少，重要冇得自己留，同上次MSC冇分別，其他的又貴，要再諗⋯⋯
報唔成名當日，細妹去完旅行接寶貝狗走，一齊食飯時講開，細妹、妹夫即刻講同佢哋一齊去歐洲，佢哋年頭已經買咗機票，一直叫我哋一齊去，但老公好堅持要去郵輪，但呢日報唔成名，老公就開始考慮，最後細妹、妹夫改咗唔去荷蘭、比利時等國家，大家定咗行程
行程
Day 1 香港→法蘭克福→Strasbourg史特拉斯堡(法國-德法邊境)
Day 2 史特拉斯堡→>Mc Authur Glen Outlet Troyes 特魯瓦
Day 3 特魯瓦→Annecy 阿納西
Day 4 阿納西→Chamonix 霞慕尼→Mont Blanc白朗峰
Day 5 Montenves-Mer de Glace蒙特維冰河列車→再上白朗峰
Day 6 霞慕尼(法國)→策馬特(瑞士)→Matterhorn馬特洪峰
Day 7 馬特洪峰-五湖步道5-Seeweg→冰河天堂
Day 8 再上馬特洪峰
Day 9 策馬特→琉森→Feldkirch(奧地利)
Day 10 Ebenalp依本立(懸崖餐廳)→Caumasee→Curon Venosta(意大利-瑞意邊境)
Day 11 Curon Venosta→Dolomiti多洛米蒂山脈
Day 12 多洛米蒂山脈
Day 13 多洛米蒂山脈
Day 14 多洛米蒂山脈
Day 15 多洛米蒂山脈→Innsbruck奧地利→Oberammergau壁畫小鎮(德國)
Day 16 壁畫小鎮→林德霍夫宮→ Wieskirche 威斯教堂→Wertheim
Day 17 Wertheim→Wertheim Village Outlet→法蘭克福(送細妹2人上機)→Koln科隆
Day 18 科隆→Rudesheim am Rheim呂德斯海姆(萊茵河畔)
Day 19 呂德斯海姆→法蘭克福
Day 20 返香港
第一段玩法國，瑞士，二大名山--白朗峰、馬特洪峰，之後去Ebenalp依本立懸崖餐廳、Caumasee，到意大利邊境
阿爾卑斯山有5大名峰，德國的楚格峰2011年去過，同一次旅程去咗瑞士的Interlaken但冇去，老公多年前去過少女峰，細妹、妹夫都去過，得我未去過，今次選擇唔去，奧地利大鐘山就未有機會去
第一日就到法國，所以會去白朗峰，另外瑞士馬特洪峰想去幾年，今次終於去到，老公想住多一晚，但考慮到去策馬特要先在Tasch特施停車，再坐火車入去策馬特鎮，每日白比租車錢，所以就住三晚，第九、十日比較趕，因為細妹好想去瑞士懸崖餐廳，又想去Caumasee
第二段玩意大利、德國，意北的多洛米期蒂山脈上年聖誕節先去過，冇諗過咁快又去，因妹夫聽朋友講話靚，想去，我哋上次去多洛米蒂山脈，只係去咗其中好少位置，今次就住多幾日細意遊，之後德國就始回程，順路去林德霍夫宮，完成路德維希三個城堡，去Wertheim Village Outlet送細妹、妹夫上機，我哋就去科隆、呂德斯海姆、法蘭克福住多三晚，點解住多三晚，因為⋯
細妹年頭買漢沙機票，到6月初我哋睇時已經貴咗千幾，好彩見到新加坡航空70週年，2張機9千有找(去幾次歐洲，今次最平)，重比細妹平，不過就要遲3回程，老公話平咗機票就玩多幾日，最後同細妹佢哋唔同飛機來回，雖然要先飛新加坡轉機， 但都好過中東啲航空公司，飛8、9 個鐘後再飛6個鐘，中間斷開，對於我嚟講係好難瞓到，新航到新加坡後直飛法蘭克福，唔使中途落機
住宿方面，今次4個人，Zermatt，多洛米蒂山區會住Apartment，去旅行重來唔煮食嘅我，今次有妹夫煮，因為佢鍾意外國Apartment有大廚房，煮幾日玩吓，又可以慳少少錢
離開Zermatt的一日，一早上山睇日出，非常好彩，見到日照金頂，老公大滿足
司機 -- 老公+妹夫
隨團攝影司 -- 老公
導遊 -- 我+妹夫
主廚 -- 妹夫
團友 -- 細妹
沒有留言:
張貼留言