台灣租車－不要找超省錢租車公司

呢篇係去台灣自駕遊，發生意外時，同租車公司傾賠償⋯的煩事！原本對台灣印象一直很好⋯食得好開心，但今次令我有D改觀⋯


出發前問過幾間租車公司，覺得有D貴，就上網睇到呢間「超省錢公司」，口啤都唔錯，當然 Cheap 精上身，貪平

日產Livian

NT9555+GPS200+1300＝NT11055，1300係機場取車，呢間「超省錢」機場冇櫃台


出發前比NT3316訂金


當日租車尾數碌卡共NT8126，比多5%都要碌卡，係因為妹夫申請咗新卡，要攞禮物

旅程第5日去烏來，單程路有迎頭車，倒車時冇為意灣位，所以撞到了


在台北時，已經Send相比相租車公司，想大約知道要整幾錢


要整NT16790，我哋都覺得貴⋯唔合理，尾燈就梗係要整，但車尾凹咗少少⋯租車公司點會整呀，我哋攞車時都有唔少花痕啦，又唔見整好晒先租比人，租車公司預咗有損耗啦，老公同妹夫都有揸開車嘅，雖然唔係做車房，但大約都有個價，而且以台灣物價人工，呢個價都真係⋯貴！


遠望凹的位置唔大

近睇先較明顯

當日還車，租車公司職員檢查完⋯打返公司，就話要收NT30,000保證金，因為要回原廠維修，等出咗價錢再退回差價

我哋梗係唔肯，之前報價都係NT16790，雖然係估算，但呢個價我哋都覺得唔合理⋯比佢屈錢，但都可以接受，但3萬就一定唔得，點知佢第時會唔會退錢，退幾多係任佢話啫⋯

再傾一輪，後尾職員就同意唔過數住，因為之前已經過咗NT5000按金，其實我哋覺得5千已經夠錢整，但鬼叫係撞咗架車咩，係咁㗎啦⋯打死狗講價！

職員寫低同意等估價出，再做賠償，即唔過數



咁我哋就還車上機返香港，落機返屋企途中，妹夫話銀行通知，租車公司過咗NT50000數，
即刻叫銀行唔好過，銀行話已經過咗數，妹夫同銀行講根本就冇同意過呢一筆數，係租車公司私自過數，而且在機場講係3萬，到過數竟然係--5萬⋯太過份

但呢間渣打銀行，就真係唔保障客戶，同一日只係差幾個鍾，算即時講都話退唔到，傾咗幾日，銀行同意Hold住筆數(相同情況，朋友試過，成功退回)



老公就email租車公司，話佢私自過數，一D誠信都冇







雖然Hold住筆數，我哋想快D知道整幾錢，追租車公司報價，但遲遲未有報價⋯

都話租車公司屈錢，車尾凹咗少少唔會整，照租比人㗎啦，未報價原來係租咗出去


中間重有email來往，老公算係有耐性，而家台灣人語法都好有問題

3月25號還車，到4月8號先報到價，話先過一筆20419，再退50000，我哋梗係唔肯

之前估係~烤漆NT3500＋版金2500+尾燈3500+30%折舊＋3天維修4440＝16790

而家係NT20419，重貴過之前，整車價錢貴咗少少⋯算，3天維修之前報4440，今次係5940，最離譜係總數刷卡收5%

有冇搞錯⋯呢D就梗係銀行交收，冇乜理由要重要收手續費⋯當初租車就話收手續費啫，而家係賠償，咁都要收⋯?!!!

當初租車每日1980有折，所以最初估3天維修4440係合理，因為租車每個客都有折，冇理由而家要收原價！


之後，銀行退回妹夫NT5萬，我哋天真哋以為銀行幫我哋搞掂咗，就咁冇再理，NT5千⋯其實都差唔多啦


過咗幾個月，銀行通知妹夫，租車公司退咗2萬幾台幣去銀行，問我哋係咪同租車公司達成協議⋯先知呢單嘢原來未搞掂！

原來銀行先前退回NT5萬比妹夫張卡，只係同意Hold住筆數，筆數係Hold住在銀行，而家租車公司退咗2萬幾台幣，咁⋯即係又再過NT5萬？

所以老公再同租車公司傾，傾好妹夫再叫銀行過數

以下email符號唔知點解到Cap圖時有問題，有D難睇，當然租車公司睇係冇問題

維修費$10390，2)$3117，3)$5940，4)$972

 



我哋唔同意總數要加30%及5%手續費

3天維修費應該係收NT4440，但老公話租車公司都肯讓步，就算


最後同意NT16330，基本上同最初估價差唔多

講明要租車公司先比正式維修單，之後再過數

但話唔知正式維修單是什麼

最後老公收到呢張「正式維修單」公司名都冇，呢張單好「流」啫，又話原廠維修，咁應該比原廠維修單，再加租車公司行政費，咁樣先合理，比張咁嘅單，你話整10萬都得啦

之前已叫妹夫唔好過數住，但妹夫話銀行已過數，都唔知兩個點溝通！

既然過咗數就算，都搞咗幾個月，大家都唔想再煩

揀呢間租車公司係失敗，但呢間渣打銀行都好唔掂，因為相同情況，朋友試過，成功退回，之後同租車公司慢慢傾，起碼唔會打死狗講價

租車由老公租，但租車錢就妹夫比卡，所以要分別租車公司同銀行傾，如果都係老公去傾會比較好，因為老公用開銀行會較好，渣打真係⋯比較差！


如果有心機，真係想email去台灣的消費者委員會投訴，不過⋯NT16330話多又唔係好多(不過喺台灣可以食好多餐嘞)，只係條氣唔順啫⋯過氣就算⋯唔想再煩

下次自駕，唔想再咁煩，應該會買全保，亦都會搵較大租車公司

我哋有買旅遊保險，最好彩係幫相屬的保險買(最近幾次都係)，當初諗住Claim唔到幾多，差啲唔想Claim，保險話試吓，到11月...(半年冇多)估唔到最後竟然Claim到港幣3千幾，計番自己比2百幾，真係煩完一大輪，總算有回報。