熱辣辣⋯去沖繩

3月中，見到去馬爾代夫有特價，叫老公睇，老公一睇就話唔坐馬航，反而見到去沖繩坐商務位，有興趣，問我唔係成日話未坐過商務咩，Package去到6月尾，係我生日，生日坐商務去咪正囉

之前問老公，不如我生日去一個小旅行，當時一口拒絕，話好熱，唔想去，估唔到商務位令佢改變！難得生日老公肯同我去玩(上次生日旅行已經係2009年去東京)，上航空公司網睇咗淨機票都4千幾，好似幾抵，所以⋯好快就買咗Package，當時都唔知沖繩有乜玩，完全冇留意過，加上就出發去東歐，個心都飛咗去克羅地亞，諗住去完旅行返嚟先算

去完旅行，睇到網友去沖繩機票只係1千幾⋯吓⋯乜咁平！早知道去沖繩咁平，我呢個Cheap精未必會買商務Package，但⋯都買咗咯，當生日豪一次啦，長途機商務唔捨得坐，短途都好，叫做坐過嘛

Package嘅Mercure Okinawa酒店張相幾吸引，間房幾大，後尾先知係Super Twin，我買Package係Standard，比佢誤導咗，都係自己心急，冇睇清楚，但朋友話間酒店幾方便，通常會將City放後面，不過間酒店1-4/7 Close out，要住3晚那霸先，而連住3晚就送1次晚餐，當然唔會錯過啦⋯hehe(但就限制唔可以住多晚中部)，返香港係早機，所以最後一晚都住那霸，中間就住2晚海邊酒店

海邊酒店唔平，所以唔揀咁貴，因為機票佔咗唔少錢，去完歐洲返嚟幾日就訂房，揀咗幾間，其中一間有海景露台嘅評分較低，而且離海灘遠少少，而Rizzan Sea Park Hotel就有私人沙灘， 4月尾已經Book唔到海景房，老公話我次次都訂湖景、海景，但有幾何坐露台吖，咁又係⋯Rizzan喺樂天評都唔錯，又好近沙灘，最後決定就呢間

幾個朋友都話沖繩魚生一般，食嘢同日本有D唔同，沖繩鄉下地方，唔好比，但一般食嘢、租車就比較平

朋友話車程長，要預多D時間，老公主要想去水族館，文化王國冇興趣，玉泉洞⋯剛去完歐洲最大鐘乳洞⋯所以都唔去，諗住去hea

亦有朋友話去過愛琴海，再見其他海岸、沙灘都比下去！果然⋯係事實！但沖繩近，2個鐘機，唔好太高要求